Fana: At a Speed of Life!

ሀገሪቱ ለፓልም ዘይት የምታወጣውን የውጭ ምንዛሬ በግማሽ የሚቀንስ ዘይት ፋብሪካ ወደ ምርት ሊገባ ነው

አዲስ አበባ፣ ሰኔ 21፣ 2011 (ኤፍ ቢ ሲ) ሀገሪቱ ለፓልም ዘይት የምታወጣውን የውጭ ምንዛሬ በግማሽ የሚቀንስ ዘይት ፋብሪካ ወደ ምርት ሊገባ ነው፡፡

በአማራ ብሄራዊ ክልላዊ መንግስት በምዕራብ ጎጃም ዞን በቡሬ ከተማ አስተዳደር ውስጥ እየተገነባ የሚገኘው በላይነህ ክንዴ የዘይት ፋብሪካ በ30 ሄክታር ላይ ያረፈ ነው፡፡

ይህ የዘይት ፋብሪካ የሃገሪቱን 60 በመቶ የሚሆነውን የዘይት ፍጆታ የመሸፈን አቅም አለው የተባለ ሲሆን፥ በቀን 1 ሺህ 400 ቶን የምግብ ዘይት እንደሚያመርት የድርጅቱ ስራ አስኪያጅ ኢንጂነር ዳኛቸው ዋሴ ገልፀዋል፡፡

በአሁኑ ወቅትም የሼድ ግንባታው ሙሉ በሙሉ ተጠናቆ የማሽን ተከላ ስራው በሂደት ላይ ሲሆን 2 ቢሊየን 53 ሚሊየን 592 ሺህ 15 ብር ነው ተብሏል፡፡

ዘይትን ለማምረት የሚጠቀምባቸው የሱፍ እና አኩሪ አተር ግብዓቶች ከሃገር ውስጥ እርሻ ምርት ይገኛሉም ነው የተባለው።

ግብዓቶቹን በቀጣይነት ለማሳደግ ምርጥ ዘሮችን ለአርሶ አደሮች በማዳረስና ዘመናዊ የሆነ የእርሻ ሜካናይዜሽንን በማዳበር ምርታማነትን ለማሻሻል እየሰራ መሆኑ ከንግድ ሚኒስቴር ያገኘነው መረጃ ያመላክታል።

የድርጀቱ ስራ አስኪያጅ ከአርሶአደሮቹ ጋር በዚህ ዙሪያ ስራዎችን ለመስራት እንቅስቃሴ መጀመሩን ጠቅሰው፥ ፋብሪካው ወደ ምርት ሲገባ 2 ሺህ ለሚሆኑ ዜጎች የስራ ዕድል ይፈጥራል ተብሎ ይጠበቃል፡፡

You might also like
Comments
Loading...