Fana: At a Speed of Life!

80 የጨቅላ ህፃናት ህክምና ማዕከላት በቀጣይ ሁለት ወራት ውስጥ ወደ ስራ ይገባሉ

አዲስ አበባ፣ ግንቦት 13፣ 2011(ኤፍ.ቢ.ሲ) 80 የጨቅላ ህፃናት ህክምና ማዕከላት በቀጣይ ሁለት ወራት ውስጥ ወደ ስራ የሚገቡ መሆኑን የጤና ሚኒስቴር አስታወቀ።

የጤና ሚኒስትር ዶክተር አሚን አማን ከፋናብሮድካስቲንግ ኮርፖሬት ጋር ባደረጉት ቆይታ፥ በአሁኑ ወቅት 60 የሚሆኑት የጨቅላ ህፃናት የህክምና ማዕከላት ስራዎቻቸው ተጠናቀው ዝግጁ መሆናቸውን ተናግረዋል ።

በወሊድ ጊዜ የሚደርስ መታፈን፣ ጊዜያቸው ሳይደርስ መወለድ እና በሚወለዱበት ጊዜ የሚፈጠር ኢንፌክሽን ጨቅላ ህፃናትን ለከፋ አደጋ ብሎም ህይወታቸው እንዲያለፍ የሚያደርጉ ምክንያቶች ናቸው።

በተለይም እነዚህ ምክንያቶች እስከ አንድ ወር ዕድሜ ባላቸው ጨቅላ ህፃናት ላይ የከፋ ጉዳት እንደሚደርሱ መረጃዎች ያሳያሉ።

ጊዜያቸው ሳይደርስ በመወለዳቸው በተፈጠሩ ችግሮች በልጆቻቸው ላይ ተፈጥረው የነበሩ ችግሮችን የሚያስታውሱት እናቶችም ለዚህ ማሳያ ናቸው።

በዘውዲቱ ሆስፒታል አስተያየታቸውን የሰጡን የህክምና ባለሙያዎች ፥የጨቅላ ህፃናት ህክምና ጥቂት በሚባሉ የህክምና ተቋማት የሚሰጥ መሆኑ በርካታ ህፃናትን ህይወታቸው እንዲያለፍ ያደርጋቸዋል ብለዋል።

የጤና ሚኒስትር ዶክተር አሚር አማን ከፋና ብሮድካስቲንግ ኮፖሬት ጋር በነበራቸው ቆይታ፥ ጨቅላ ህፃናት በቂ ህክምና የሚያገኙባቸው ተቋም አለመኖሩን ተናግረዋል።

ያሉትም ቢሆኑ ቁጥራቸው አነስተኛ ከመሆኑ በተጨማሪ አብዛኞቹ አዲስ አበባ ላይ ብቻ የከተሙ መሆናቸው የጨቅላ ህፃናት ህክምና ተደራሽ እንዳይሆን አድረጎታል።

ሚኒስትሩ እነዚህን ችግሮች በመረዳትም የጨቅላ ህጻናትን የህክምና ማዕከላት በሁሉም የሀገሪቱ ክፍሎች ለማቋቋም እና ለማዳረስ ከሁለት ዓመት በፊት ፕሮጀክት ተቀርፆ ወደ ስራ መገባቱን እና ለዚህም 35 ሚሊየን ዶላር ወጭ መደረጉን ነው የተናገሩት።

ማዕከላቱን በሀገሪቱ ሁሉም አካባቢዎች ለማስፋትም 80 ዞኖች ተመርጠው ወደ ስራ ተገብቷል ነው ያሉት ሚኒስትሩ።

እነዚህ ማዕከላት የሚከፈቱበት ሆስፒታልም የተመረጡበት በሁለት መስፈርቶች መሆኑን ነው ዶክተር አሚር የተናገሩት።

በዞን አንድ  ሆስፒታል የሚለው እና ሆስፒታሉ የሚገኝበት ቦታ ወይም ለህበረተሰቡ ያለው ተደራሽነት የሚሉት ማዕከላቱ እንምዲከፈቱባቸው የተመረጡት ቦታዎች መስፈርቶች ናቸው።

የጨቅላ ህፃናት ማእከላቱም በእነዚህ ዞኖች ወደ ስራ እንዲገቡ ለማድረግ የተለያዩ ተግባራት እየተከወኑ ይገኛሉ።

ዶክተር አሚር አማን እንዳሉን ከሆነ ከ 80 ዎቹ ማእከት ውስጥ 60 ዎቹ ተጠናቀዋል።

20 ዎቹንም ቢሆን ለማጠናቀቀቅ ውስን ስራዎች ናቸው የቀሩት ያሉት ሚኒስትሩ በቀጣይ ሁለት ወራት ሁሉም ማእከላት ወደ ስራ ይገባሉ ብለዋል።

ማዕከላቱን ከመክፈት ጎን ለጎንም ባለሙያዎችን የማዘጋጀት ስራም እየተሰራ ነው ያሉት ሚኒስትሩ፥

ማዕከላቱ ለሚከፈቱባቸው ሆስፒታሎችም በመካከለኛ ደረጃ ወይም በኤች ኦ ደረጃ ያሉ ሀኪሞችን ዝግጁ የማድረግ ስራዎች እተሰሩ መሆኑንም አንስተዋል።

በተለይም የባለሙያዎችን ሀገራዊ እጥረት በዘላቂነት ለመፍታትም የሚያስችል ስራዎች ከከፍተኛ ትምህርት ተቋማት እና ከአጋር ድርጅቶች ጋር በመሆን እየተሰራ መሆኑን ዶክተር አሚር ተናግረዋል።

ማዕከላቱም ለህፃናቱ መስጠት የሚያስፈልገውን ህክምና መስጠት የሚያስችሉ መሆናቸውን ያነሱት ሚኒስትሩ፥ ለዚህ የሚያስፈልጉ ግብዓቶች መሟላታቸውንም ጠቁመዋል።

ማዕከላቱ ወደ ስራ ሲገቡም ከአንድ ቦታ ወደ ሌላ ቦታ ህክምናውን ፍለጋ የሚወጡ ተገልጋዮችን እንግልት ከመቀነሱ ባሻገር የጨቅላ ህፃናትን ሞትም የሚታደግ ይሆናል።

በዙፋን ካሳሁን

You might also like
Comments
Loading...