Fana: At a Speed of Life!

19 ኛው ዓለም አቀፍ የወጪ ንግድ ፎረም በአዲስ አበባ ሊካሄድ ነው

አዲስ አበባ፣ ግንቦት 6፣ 2011 (ኤፍ.ቢ.ሲ) 19 ኛው ዓለም አቀፍ የወጪ ንግድ ፎረም በአዲስ አበባ ከተማ ሊካሄድ ነው።

የኢፌዴሪ የንግድና ኢንዱስትሪ ሚኒስቴር እና ዓለም አቀፉ የንግድ ማዕከል ከአፍሪካ ህብረት ጋር በመተባበር 19 ኛውን ዓለም አቀፍ የወጪ ንግድ ፎረም በአዲስ አበባ ለማዘጋጀት ተስማምተዋል።

ስምምነቱንም የንግድና ኢንዱስትሪ ሚኒስቴር ሚኒስትር ወይዘሮ ፈትለወርቅ ገብረእግዚአብሄር እና የዓለም አቀፉ ንግድ ማዕከል ዋና ዳይሬክተር ኤራንቻ ጎንዛሌዝ ተፈራርመውታል።

በዚህ መሰረትም 19 ኛው ዓለም አቀፍ የወጪ ንግድ ፎረም እንደ አውሮፓውያን አቆጣጠር ከህዳር 18 እስከ 22 ቀን 2019 ድረስ በአዲስ አበባ የሚካሄድ ይሆናል።

በፎረሙም ከ1 ሺህ በላይ የቢዝነስ መሪዎች ፣ፖሊስ አውጪዎች እንዲሁም የተለያዩ የንግድ ባለሙያዎች ይሳተፋሉ ተብሎ ይጠበቃል።

ፎረሙ የሚካሄደውም በአፍሪካ ኢንዱስትሪ ሳምንት ወቅት ሲሆን፥ ይህም በአፍሪካ አህጉር ያለውን የንግድ እንቅስቃሴ ከሌሎች ሀገራት ጋር ለማስተሳሰርና ለማበረታታት ያስችላል ነው የተባለው።

ፎረሙ በአፍሪካ ተግባራዊ በሚደረገው የነፃ ንግድ እንቅስቃሴ እና ቢዝነስ ዙሪያ ትኩረት የሚያደርግ መሆኑም ተገልጿል።

ከዚህ ባለፈም የተለያዩ የቢዝነስ ሰዎች ሃሳብ የሚለዋወጡበት፣የአቅም ማጎልበቻ ስልጠናዎች የሚሰጡበት እና የተለያዩ የንግድ ስምምነቶች የሚፈፀሙበት እንደሚሆን ይጠበቃል ።

በተጨማሪም ፎረሙ ወጣቶችና ሴቶችን ለተለያዩ አዳዲስ የስራ ዕድል ፈጠራዎች የሚያበረታቱ ስልጠናዎች የሚሰጡበት እና አዳዲስ የቢዝነስ አማራጮች የሚተዋወቁበት ይሆናል ተብሎ ይጠበቃል።

You might also like
Comments
Loading...