Fana: At a Speed of Life!

12 አነስተኛ የፀሀይ ሀይል ማመንጫዎችን ከ296 ሚሊየን ብር በላይ በሆነ ወጪ ለመገንባት ስምምነት ተፈረመ

አዲስ አበባ፣ ግንቦት 23፣ 2011 (ኤፍ.ቢ.ሲ) በተለያዩ የሀገሪቱ ክፍሎች 12 የፀሀይ ሀይል ማመንጫዎችን በ296 ሚሊየን 26 ሺህ 224 ብር ለመገንባት የሚያስችል ስምምነት ተፈረመ፡፡

እነዚህ የፀሀይ ሀይል ፕሮጀክቶች የብሄራዊ ኤሌክትሪክ ሀይል መረብ በማይደርስባቸው አካባቢዎች የሚገነቡ ናቸው፡፡

በኦሮሚያ ሶስት፣ አማራ ሁለት፣ እና በደቡብ ብሄርና ብሄረሰቦች ክልል ሁለት የፀሀይ ሀይል ፕሮጀክቶቹ ይገነባሉ፡፡

እንዲሁም በሶማሌ፣ ትግራይ፣ አፋር፣ ቤኒሻንጉል ጉሙዝ እና በጋምቤላ ክልሎች አንዳንድ የፀሀይ ሀይል ፕሮጀክቶቹ ይገነባሉ፡፡

እነዚህ የፀሀይ ሀይል ፕሮጀክቶች ሲጠናቀቁ 67 ሺህ 700 ቤቶች የአሌክትሪክ ሀይል እንዲያገኙ ያስችላሉ ነው የተባለው።

መንግስት ከፀሀይ፣ ንፋስ እና ሌሎች ታዳሽ ሀይሎች 35 ሚሊየን ህዝብ የኤሌክትሪክ ሀይል እንዲያገኝ እየተሰራ ነው ተብሏል፡፡

በዚህም በሀሪቱ በሚገኙ 250 ከተሞች 6 ሚሊየን የሚሆኑ ቤቶች ከታዳሽ ሀይሎች የኤሌክትሪክ ሀይል ያገኛሉ፡፡

በተመሳሳይ 25 ፕሮጀክቶችን ለመገንባት የዲዛይን ስራ እየተሰራ ሲሆን፥ ለግንባታው 15 ሚሊየን ዶላር በብድርና ልገሳ ከአፍሪካ ልማት ባንክ እንደተገኘ ተነግሯል፡፡

በአጠቃላይ በሀገሪቱ ተመሳሳይ ፕሮጀክቶችን ተግባራዊ ለማድረግ ከአለም ባንክ 400 ሚሊየን ዶላር እና ከአፍሪካ ልማት ባንክ 100 ሚሊየን ዶላር በብድርና ድጋፍ እንደተመቻቸም ነው የተነገረው፡፡

ግንባታውን ከሚያከናውኑ ሶስት የቻይና እና አንድ የስፔን አለም አቀፍ ተቋራጮች ጋር የኢትዮጵያ ኤሌክትሪክ አገልግሎት የውል ስምምነት የፊርማ ስነ-ስርዓት አካሂዷል፡፡

በባሃሩ ይድነቃቸው

You might also like
Comments
Loading...