Fana: At a Speed of Life!

ፍርድ ቤቱ አቶ ጌታቸው አሰፋን ጨምሮ ያልተያዙ 4 የብሔራዊ መረጃና ደህንነት አባላት መጥሪያ እንዲደርሳቸው ትዕዛዝ ሰጠ

አዲስ አበባ፣ ግንቦት 16፣ 2011 (ኤፍ.ቢ.ሲ) ፍርድ ቤቱ ለሶስተኛ ጊዜ አቶ ጌታቸው አሰፋን ጨምሮ ያልተያዙ 4 የብሔራዊ መረጃና ደህንነት አባላት መጥሪያ እንዲደርሳቸው ትዕዛዝ መስጠቱ ተገለፀ፡፡

አቃቤ ህግ ስልጣንን ያለአግባብ በመጠቀም ከፍተኛ የሰብዓዊ መብት ጥሰጥ ፈፅመዋል ብሎ ክስ ከመሰረተባቸው 26 የብሔራዊ መረጃና ደህንነት አገልግሎት ሰራተኞች መካከል ባልተያዙት አቶ ጌታቸው አሰፋን ጨምሮ 4 ተከሳሾች ላይ ፍርድ ቤቱ ዳግም የመጥሪያ ትዕዛዝ አስተላልፏል፡፡

የፌደራል ፖሊስ በበኩሉ ባልተያዙ 4 ተከሳሾች ላይ የመጥሪያ ትዕዛዙ የደረሰኝ ግንቦት 14 በመሆኑና መጥሪያው የሚደርሰው ትግራይ ክልል በመሆኑ ጊዜ ይሠጠኝ ባለው መሰረት ፍርድ ቤቱ ዳግም ተለዋጭ ቀጠሮ ሰጥቷል፡፡

ከጉዳዩ ጋር በተያያዘ በቁጥጥር ስር የዋሉ 22 ተከሳሾች ያቀረቡት ደመወዛችን ይከበርልን ጥያቄ ፍርድ ቤቱ የደመወዝ ይከበርልን ጥያቄ በመደበኛ ፍርድ ቤት የሚታይ አለመሆኑን በመግለጽና የሚመለከተውን የሲቪል ሰርቪስ ተቋም መጠየቅ እንደሚችሉ በመጥቀስ የተከሳሾችን ጥያቄ ውድቅ ማድረጉ ታውቋል፡፡

21ኛ ተከሳሽ ባቀረቡት የክስ መቃወሚያ ላይ አቃቤ ህግ በፅሁፍ ምላሽ አቅርቧል፡፡

በተመሳሳይ አቃቤ ህግ የምስክሮቸ ደህንነት እንዲከበርልኝ በማለት የጠየቀውን ጥያቄ ተከሳሾች ምላሻቸውን በጠበቆቻቸው አማካኝነት በፅሁፍ ለፍርድ ቤቱ ማቅረባቸው ታውቋል፡፡

አቃቤ ህግ በበቂ ሁኔታ አባዝቶ እንዲሰጥ የታዘዘውን የሲዲ ማስረጃም በዛሬው ዕለት በሚፈለገው መጠን በማባዛት ለተከሳሽ ጠበቆች ሰጥቷል፡፡

የፌደራሉ ከፍተኛ ፍርድ ቤት ልደታ ምድብ 1ኛ የወንጀል ችሎት ዛሬ በዋለው ችሎት እስካሁን ባልተያዙ 4 የብሔራዊ መረጃና ደህንነት አባላት ላይ የፌደራል
ፖሊስ መጥሪያ በማድረስ ለሰኔ 3 እንዲያቀርብ ወስኗል።

ፍርድ ቤቱም የ21ኛ ተከሳሽ መቃወሚያ ላይ ብይን ለመስጠትና በምክሮች ጥበቃ ላይ ክርክር ለማድረግ ለሰኔ 3 ቀን 2011 ዓ.ም ቀጠሮ መያዙን ከጠቅላይ አቃቢ ህግ ያገኘነው መረጃ ያመላክታል፡፡

You might also like
Comments
Loading...