Fana: At a Speed of Life!

ፌስቡክ የጥላቻ ንግግሮችን የሚያሰራጩ በርካታ ታዊቂ የብሪታኒያ ጦማሪያንን አገደ

አዲስ አበባ፣ ሚያዚያ 25፣2011 (ኤፍ.ቢ.ሲ) ፌስቡክ የሀሰት መረጃዎችንና የጥላቻ ንግግሮችን በስፋት የሚያሰራጩ ታዋቂ የብሪታኒያ ጦማሪያንን አግዷል።

ኩባንያው ዕገዳውን ያስተላለፈው ግለሰቦቹ የፌስቡክን ህግና ደንብ በመተላለፍ ሃይማኖትንና ዘርን መሰረት ያደረጉ የጥላቻና ሀሰት መረጃዎችን በማሰራጨታቸው ነው ተብሏል።

በዚህ መሰረትም ድርጅቱ የቀኝ ዘመም ፍልስፍና አራማጁና የኢንፎ ዋርስ ድረ ገፅ አዘጋጅ አሌክስ ጆንስ፣ የዚሁ ድረገፅ አርታኢ ፖል ጆሴፍ እና የቀድሞው ብሪት-ባርት ጋዜጣ አርታኢ ሚሎ ይኖፖሎስን ገጹን እንዳይጠቀሙ ከልክሏል።

በተጨማሪም የፀረ እስልምና እምነት አራማጅ የሆኑ የበርካታ ጦማሪያንን ገፅ ከመተግበሪያው ማስወገዱን ነው ያስታወቀው ።

በቀጣይም ግለሰቦቹ ፌስቡክ በሚያስተዳድረው ኢንስታግራም መተግበሪያ ላይ ያላቸው ገፅ የሚታገድ መሆኑም ተጠቁሟል ።

ፌስ ቡክ ጉዳዩን አስመልክቶ ባወጣው መግለጫ በርካታ ተከታዮች እያሏቸው ዘርን እና ሃይማኖትን መሰረት ያደረጉ የጥላቻ ንግግሮች እንዲሁም የሀሰት መረጃዎችን የሚያሰራጩ ደንበኞችን እንደማይታገስ አስጠንቅቋል።

ስለሆነም መተግበሪያውን የሚጠቀሙ ደንበኞች ሰብአዊነትን መሰረት ያደረገና ዘመናዊ ዕውቀትን የሚያስጨብጡ መረጃዎችን በማሰራጨት እንዲጠቀሙ አሳስቧል።
ምንጭ ፦ቢቢሲ

You might also like
Comments
Loading...