Fana: At a Speed of Life!

ጂ ኤም ፈንገስ በሽታ አስተላላፊዋን የወባ ትንኝ የመግደል አቅም እንዳለው አንድ ጥናት አመላከተ

አዲስ አበባ፣ ግንቦት 23፣ 2011 (ኤፍ.ቢ.ሲ) ጂ ኤም ፈንገስ የወባ በሽታ አስተላላፊዋን የወባ ትንኝ 99 በመቶ በፍጥነት የመግደል አቅም እንዳለው አንድ ጥናት አመላከተ።

የአሜሪካው ሜሪ ላንድ ዩኒቨርሲቲ ተመራማሪዎች እና አይ አር ኤስ ኤስ የተሰኘው የቡርኪናፋሶ ጥናትና ምርምር ተቋም ባካሄዱት ጥናት የወባ በሽታ የምታስተላልፈውን ሴት የወባ ትንኝ (አናፊሎስ) የሚያጠቃ ማታሪዜም ፒንሻንስ የተሰኘ ፈንገስ ማግኘታቸውን አስታውቀዋል።

ይህን የፈንገስ አይነት በዘረ መል የማራቢያ ዘዴ በማሻሻልም በፍጥነት በርካታ ሴት የወባ ትንኞችን መግደል የሚችል መርዛማ ንጥረ ነገር መስራት መቻላቸው ተነግሯል።

የወባ በሽታ የምታስተላልፈው ትንኝ በምትገኝበት 6 ሺህ ካሬ ሜትር ስፋት ባለው ሰው ሰራሽ ሃይቅ ላይ በተካሄደው ጥናት፥ ከፈንገሱ የተገኘው መርዛማ ንጥረ ነገር 99 በመቶ ትንኞችን የመግደል አቅም እንዳለው ተረጋግጧል።

በጥናቱ 1 ሺህ 500 የሚሆኑ ሴት የወባ ትንኞች የተካተቱ ሲሆን፥ መርዛማ ንጥረ ነገሩ ከተሞከረባቸው 45 ቀናት በኋላ 13 የወባ ትንኞች ብቻ መትረፋቸው በጥናቱ ተመላክቷል።

የጥናቱ ዓላማ የወባ ትንኞችን ማጥፋት አለመሆኑን የገለጹት ተመራማሪዎቹ፥ ግኝቱ በዓለም አቀፍ ደረጃ የበርካታ ሰዎችን ህይዎት በመቅጠፍ ላይ የሚገኘውን የወባ በሽታ ለመከላከል የሚስያችል ነው ብለዋል።

በዓለም በየዓመቱ ከ400 ሺህ በላይ ሰዎች ሴቷ የወባ ትንኝ ከሰው ወደ ሰው በምታስተላልፈው የወባ በሽታ ምክንያት ለህልፈት የሚዳረጉ ሲሆን፥ 219 ሚሊየን የሚሆኑት ደግሞ በበሽታው ይያዛሉ።

ምንጭ፦ ቢቢሲ

You might also like
Comments
Loading...