Fana: At a Speed of Life!

የፌደራል፣ የክልሎችና የከተማ አስተዳደር ምክር ቤቶች የአፈ-ጉባኤዎች የጋራ የምክር መድረክ በመቐለ እየተካሄደ ነው

አዲስ አበባ ፣ ግንቦት 16፣ 2011 (ኤፍ.ቢ.ሲ) የፌደራል፣ የክልሎችና የከተማ አስተዳደር ምክር ቤቶች የአፈ-ጉባኤዎች የጋራ የምክር መድረክ ዛሬ በመቐለ ከተማ ተጀመረ።
 
የህዝብ ተወካዮች ምክር ቤት አፈ-ጉባኤ አቶ ታገሰ ጫፎ የጋራ የምክክር መድረኩን ዓላማ በማስተዋወቅ ውይይቱ በይፋ መከፈቱን አብስረዋል።
 
በንግግራቸውም ምክር ቤቶች ተጠሪነታቸው ለህዝብ እንደመሆኑ አስፈፃሚ አካላት የህዝብ እና የመንግስት ሀብትን በአግባቡ ስራ ላይ ማዋላቸውን ማረጋገጥ አንዱ ቁለፍ ተግባር ነው ብለዋል።
 
ከዚህም በመነሳት በፌደራል አስፈፃሚ አካላት ላይ የሚወጡ የኦዲት ሪፖርቶችን በልዩ ኮሚቴ በመፈተሽ አስፈላጊ ማሻሻያዎች እንዲደረጉ ጥረት እየተደረገ እንደሚገኝ ገልፀዋል።
 
በተጨማሪም የትግራይ ክልል ምክትል ርዕሰ መስተዳደር ዶክተር ደብረፅዮን ገብረሚካኤል በመድረኩ መክፈቻ ላይ መልዕክት አስተላልፈዋል።
 
ምክትል ርእሰ መስተዳድሩ ህገመንገስታዊ ስርዓቱ በሀገሪቱ ስር እንዲሰድ ምክር ቤቶቹ የበኩላቸውን ሊወጡ ይግባል ብለዋል በመልዕክታቸው።
 
ቀጣዩ ምርጫም በአግባቡ እና በጊዜው እንዲካሄድ የምክር ቤቶቹ ሚና ወሳኝ መሆኑንም አነስተዋል።
 
ከቅርብ ጊዜ ወዲህ በክልሎች መካከል ያለው ግኑኝነት እየሻከረ እና በማንነት ላይ ያነጣጠረ ጥቃት እየተበራከተ በመምጣቱ ይህንን በመከላከሉ ምክር ቤቶች የበኩላቸውን ሚና እንዲወጡ ነው ጥሪ ያቀረቡት።
 
ዛሬ የተጀመረው መድረክ እስከ ነገ የሚቀጥል ሲሆን፥ በምክር ቤቶቹ ውጤታማነት፣ በፓርላማ አቅም ግንባታ ፕሮግራም፣ በፌዴሬሽን ምክር ቤት አሰራር ዙሪያ የተደረገ ጥናት፣ በህዝብ ተወካዮች ምክር ቤት ረቂቅ የኮሙዩኒኬሽንና የተደራሽነት ስትራቴጂ ሰነዶች ቀርበው ሰፊ ውይይት እንደሚደረግባቸውም ይጠበቃል።
 
ከመክፈቻው በኋላ “የእንደራሴው ትሩፋት” በሚል ርዕስ የተዘጋጀ አነቃቂ ሰነድ በዶክተር ምህረት ደበበ መቅረቡንም ከኢፌዴሪ የህዝብ ተወካዮች ምክር ቤት ያገኘነው መረጃ ይጠቁማል።
You might also like
Comments
Loading...