Fana: At a Speed of Life!

የጥቁር አንበሳ ሆስፒታል ተገቢውን አገልግሎት እየሰጠ መሆኑን ገለፀ

አዲስ አበባ፣ ግንቦት 7፣ 2011 (ኤፍ.ቢ.ሲ) የጥቁር አንበሳ ሆስፒታል የተወሰኑ የድህረ ምረቃ ሃኪሞች በስራ ላይ ባይገኙም ተገቢውን አገልግሎት እየሰጠ መሆኑ አስታወቀ፡፡

በአዲስ አበባ ዩኒቨርስቲ የጤና ሳይንስ ኮሌጅ እና የጥቁር አንበሳ ሆስፒታል ስራ አስፈጻሚ ዶክተር ዳዊት ወንድምአገኝ ለፋና ብሮድካስቲንግ ኮርፖሬት እንደገለፁት በሆስፒታሉ የህክምና አገልግሎት ሲሰጡ ከነበሩት ከ1 ሺህ 200 በላይ የድህረ ምረቃ ሃኪሞች ወይንም ሬዚደንስ እጩ ምሩቃኖች መካከል የተወሰኑት በስራ ላይ ላይ አልተገኙም ብለዋል፡፡

ዶክተር ዳዊት ከድህረ ምረቃ ስፔሻሊስት ሃኪሞቹ መካከል የተወሰኑት ወደ ስራ ገበታቸው ባይመለሱም በሆስፒታሉ አገልግሎት አሰጣጥ ላይ ተጽእኖ እንዳልተፈጠረ እና ታካሚዎችን በአግባቡ እያገለገሉ መሆኑን ገልፀዋል፡፡

ከድህረ ምረቃ እጩ ስፔሻሊስቶች መካከል የህክምና ሙያውን የሚጠይቀውን ስነ ምግባርና የህዝብ ተቆርቋሪነት አክብረው በስራ ገበታቸው ላይ የተገኙ በመኖራቸው የሆስፒታሉ አገልግሎት ሳይስተጓጎል መቀጠል እንደቻለም ነው የጠቆሙት፡፡

በዚህም 1 ሺህ 200 ከሚሆኑት ስፔሻሊስት ሃኪሞች አብዛኞቹ በስራ ገበታቸው ላይ ተገኝተው አገልግሎት እየሰጡ በመሆኑ በሆስፒታሉ ላይ ጫና አለመፈጠሩንም ነው ዶክተር ዳዊት የገለጹት።

በጥቁር አንበሳ ሆስፒታልና የጤና ሳይንስ ኮሌጁ የህክምና ዳይሬክተር የሆኑ ዶክተር ይርጉ ገብረህይወት በየአመቱ ከ500 ሺህ በላይ ታካሚዎችን የሚያስተናግደው የሃገሪቱ አንጋፋ ሆስፒታል መሆኑን አንስተዋል፡፡

ተቋሙ በየቀኑ ለ1 ሺህ 200 ቋሚ ታካሚዎች እና ከ15 ሺ በላይ ተመላላሾች ታካሚዎች የሚስተናገዱበት በመሆኑ የተወሰኑት የድህረ ምረቃ ሃኪሞቹ ከስራ ገበታቸው መቅረት የሙያውን ስነ ምግባር መጣስ መሆኑን አብራርተዋል።

የተነሱ ችግሮች ላይ መፍትሄዎች በቅደም ተከተላቸው ለመስጠት ተቋሙ እየሰራ በሚገኝበት እና ችግሮችን ተነጋግሮ መፍታት እየተቻለ ከስራ ገበታ መቅረት አግባብ አለመሆኑን ተናግረዋል።

ዶክተር ይርጉ ተቋሙ ከስራ ገበታቸው በቀሩት ላይ እንደ አስፈላጊነቱ የዲሲፕሊን እና የህግ እርምጃ እንደሚወስድ አስታውቀዋል፡፡

አሁንም ቢሆን ወደ ስራ ገበታቸው ላይ ለሚመለሱ እና ለመነጋገር ለሚፈልጉ የድህረ ምረቃ ስፔሻሊስቶች ተቋሙ በሩ ክፍት መሆኑን ገልፀዋል።

በፀጋየ ንጉስ

You might also like
Comments
Loading...