Fana: At a Speed of Life!

የኦሮሞና የጋምቤላ ሕዝቦች የወንድማማችነትና የአንድነት መድረክ እየተካሄደ ነው

አዲስ አበባ፣ ግንቦት 12፣ 2011(ኤፍቢሲ) የኦሮሞና የጋምቤላ ሕዝቦች የወንድማማችነትና የአንድነት መድረክ በጋምቤላ ከተማ እየተካሄደ ነው።

በመድረኩ ላይ የጋምቤላ ክልል ርዕሰ መስተዳድር አቶ ኡመድ ኡጁሉ ህዳር 29 የመሰብሰቢያ አዳራሽ በመገኘት የመክፈቻ ንግግር አድርገዋል።

ርዕሰ መስተዳደሩ በዚሁ ንግግራቸው እንደገለጹት÷ የኦሮሚያና የጋምቤላ ክልል ህዝቦች ለዘመናት የቆየ ትስስር እንዳላቸው አስረድተዋል።

ይህን ግንኙነት በማጠናከር የተሻለች ሀገር ለመገንባት በሚደረገው ርብርብ ሁለቱ ህዝቦች የጎላ ድርሻ ይኖራቸዋልም ብለዋል።

የህዝቦችን አንድነት ለማጠናከርና ሀገሪቱን ለማስቀጠል የተከፈለው ዋጋ ውጤት እያመጣ መሆኑን ነው ርዕሰ መስተዳደሩ የተናገሩት።

የሁለቱ ክልሎችን ህዝብ በማጋጨት የራሳቸውን ትርፍ ለማጋበስ ይንቀሳቀሱ የነበሩ ራስ ወዳዶች ያለመረጋጋት ፈጥረው የነበረ መሆኑን በመግለጽ የሁለቱ ክልሎች አመራሮችና ህዝቦች ተቀራርበው ዘላቂ ሰላምን ለማረጋገገጥ እየሰሩ ይገኛሉ ሲሉም የጋምቤላ ክልል ርዕሰ መስተዳድር አቶ ኡመድ ኡጁሉ አስረድተዋል።

የህዝብ ለህዝብ ትስስሩ የሁለቱ ክልሎችን ሰላምና አንድነት በማጠናከር ለልማትና ለሰላም ያላቸውን አንድነት የበለጠ እንደሚያጠናክረውም ገልጸዋል።

የኦሮሚያ ክልል ምክትል ርዕሰ መስተዳድር አቶ ሽመልስ አብዲሳ በበኩላቸው የኢትዮጵያን ሰላም አንድነትና ልማት ለማረጋገጥ የኦሮሚያ ክልል መንግስትና ህዝብ ከመቼውም ጊዜ በላቀ ከሌሎች ክልሎችና ህዝቦች ጋር በትብብር እንደሚሰራ ገልጸዋል።

ኢትዮጵያ የሁሉም ብሄር ብሄረሰቦችና ህዝቦች እናት ነች ያሉት ምክትል ርዕሰ መስተዳደሩ የኢትዮጵያ ሉዓላዊነት በተደፈረበት ወቅት ህዝቦቿ ያለምንም ልዩነት በመረባረብ ጠላቶቿን ሲመክቱ መቆየታቸውንም አንስተዋል።

አሁንም ለሰላሟ፣ ልማቷና ለህዝቦቿ ፍትሐዊ ተጠቃሚነት በትብብር እንሰራለን ሲሉ ምክትል ርዕሰ መስተዳድሩ ተናግረዋል።

የህዝቦች ሰላምና አብሮነት በሴራ የማይላላ መሆኑን በመግለጽ በጋምቤላና ኦሮሚያ ክልሎች ህዝብ የጋራ ተጠቃሚነትና ሰላም ዙሪያ ሁለቱ ክልሎች አብረው እንደሚሰሩ አስገንዝበዋል።

You might also like
Comments
Loading...