Fana: At a Speed of Life!

የኢትዮ- ህንድ የኢኖቬሽንና ቴክኖሎጂ ማዕከል ምስረታ እንቅስቃሴ ተጀመረ

አዲስ አበባ፣ ግንቦት 16፣ 2011 (ኤፍ.ቢ.ሲ) የኢትዮጵያ እና ህንድ የኢኖቬሽንና ቴክኖሎጂ ማዕከል ምስረታ እንቅስቃሴ ተጀመረ።
በህንድ ከዚህ ቀደም በተካሄደው የ2019 “የምርምርና እድገት” ጉባኤ ላይ የኢትዮ- ህንድ የኢኖቬሽንና ቴክኖሎጂ ማዕከል ምስረታ በህንድ ይፋ መደረጉ ይታወሳል።
በኢትዮጵያ የህንድ ኤምባሲ ከኢኖቬሽንና ቴክኖሎጂ ሚኒስትር፣ ከማዕድን ሚኒስትር እና ከግብርና ሚኒስትር ጋር በማዕከሉና በቴክኖሎጂ መረጣ ዙሪያ ምክክር አድርጓል።
በኢትዮጵያ የህንድ አምባሳደር አኑራ ስሪቫስታቫ 50 የህንድ አነስተኛና መካከለኛ ቴክኖሎጂዎችን በ5 ዓመታት ውስጥ በኢትዮጵያ በማላመድ ወደ ገበያ ለማቅረብ እንደሚሰራ ተናግረዋል፡፡
የማዕከሉ ግንባታ የህንድ ቴክኖሎጂዎችን በኢትዮጵያ በማላመድ የእውቀት ሽግግር ለማድረግና የስራ እድል ለመፍጠር ያግዛል ተብሏል፡፡
በየአመቱ ከዩኒቨርሲቲ ተመርቀው የሚወጡ ወጣቶች የስራ እድል ማግኘት ያሳስበናል ያሉት የኢኖቬሽንና ቴክኖሎጂ ሚኒስትሩ ዶክተር ጌታሁን መኩሪያ፥ የማዕከሉ ወደ ስራ መግባት ይህንን ችግር እንደሚያቃልለው ገልጸዋል፡፡
ማዕከሉ ስራ ሲጀምር የህንድ የቴክኖሎጂ ውጤቶች በኢትዮጵያ እንዲሸጋገሩ ብቻ ሳይሆን የኢትዮጵያ ቴክኖሎጂዎችም አለም አቀፍ ተወዳዳሪ እንዲሆኑ በር ይከፍታል ብለዋል፡፡
የግንባታው ወጪ ሙሉ በሙሉ በህንድ መንግስት የሚሸፈነው ማዕከል፥ የህንድ ጠቅላይ ሚኒስትር ናሬንድራ ሞዲ የህንድ ቴክኖሎጂዎችን በአፍሪካ ማሸጋገር የሚለው እቅዳቸው አካል መሆኑን ከኢኖቬሽንና ቴክኖሎጂ ሚኒስቴር ያገኘነው መረጃ ያመላክታል፡፡
ሚኒስትሩ ከህንድ የሳይንስና ቴክኖሎጂ፣ የመሬት ሳይንስ፣ የደንና የአየር ንብረት ለውጥ ህብረት ሚኒስትር ጋር የኢኖቬሽንና ቴክኖሎጂ ማዕከሉን ምስረታ በህንድ ሃይደራባድ ይፋ ማድረጋቸው የሚታወስ ነው፡፡

Chat Conversation End
You might also like
Comments
Loading...