Fana: At a Speed of Life!

የብሄራዊ ባንክ ገዥ ኢትዮጵያ የመጠባበቂያ የውጭ ምንዛሬ ክምችቷን ለመጠቀም የሚያስገድድ ሁኔታ ውስጥ አይደለችም አሉ

አዲስ አባባ፣ ግንቦት 3፣ 2011 (ኤፍ.ቢ.ሲ) ኢትዮጵያ የመጠባበቂያ የውጭ ምንዛሬ ክምችቷን እንድትጠቀም የሚያስገድድ ሁኔታ ውስጥ እንደማትገኝ የኢትዮጵያ ብሄራዊ ባንክ ዋና ገዥ ዶክተር ይናገር ደሴ አስታወቁ።

ዶክተር ይናገር ደሴ በተያዘው ዓመትም ሀገሪቱ በቂ ሊባል የሚችል የመጠባበቂያ የውጭ ምንዛሬ ክምችት እንዳላት ገልጸዋል።

የዕለት ተዕለቱ የኢኮኖሚ እንቅስቃሴ የሚመራው ከወጪ ንግድ፣ ከብድርና እርዳታ፣ ከውጭ ቀጥታ ኢንቨስትመንት እና ከዳያስፖራው በሀዋላ ከሚላክ የውጭ ምንዛሬ መሆኑንም አስታውሰዋል።

በየጊዜው የሚከፈሉ የውጭ ዕዳ ክፍያዎች፣ ለግል ዘርፉ ሌተር ኦፍ ክሬዲት፣ ለነዳጅና ለመድሐኒት ግዥና ለመሳሰሉት ወጪዎችም በዚሁ እንደሚሸፈኑ ተናግረዋል።

ዶክተር ይናገር አንድ ሀገር የውጭ ምንዛሬን በመጠባበቂያነት የምታስቀምጠው ችግር ሲገጥማት አውጥታ ለመጠቀም እንጂ የዕለት ተዕለት ኢኮኖሚውን ለመምራት አለመሆኑንም አብራርተዋል።

በመሆኑም በአሁኑ ጊዜ ከላይ የተጠቀሱት የውጭ ምንዛሬ ምንጮች ያልተቋረጡ በመሆኑ የመጠባበቂያ ክምችት ለመጠቀም የሚያስገድድ ሁኔታ ውስጥ ሀገሪቷ ያለመግባቷን ገልጸዋል።

በተያዘው ዓመትም ከተለያዩ የውጭ ሀገራት ምንጮች የተሻለ የውጭ ምንዛሬ በመገኘቱ ከባለፉት ዓመታት በተሻለ የውጭ ምንዛሬ መጠባበቂያዋ ክምችት መኖሩንም አረጋግጠዋል።
በተለያዩ ምክንያቶች አምራች ኢንዱስትሪው የሚፈልገውን ያህን የውጭ ምንዛሬ ማቅረብ ባይችልም ኢኮኖሚውን አሁን ባለበት ሁኔታ ማስቀጠል የሚያስችል በቂ የውጭ ምንዛሬም አለ ብለዋል።

ባለፉት ዓመታት የተቀዛቀዘውን የወጪ ንግድ ማሳደግ ግን ዋነኛው የውጭ ምንዛሬ እጥረትን ለመፍታት የሚያስችል በመሆኑ በተለይ በግብርናው ዘርፍ ላይ መሰረታዊ ለውጥ ማምጣት የሚያስችሉ እርምጃዎችን መውሰድ ወሳኝ መሆኑን አንስተዋል።

ምንጭ፦ኢዜአ

You might also like
Comments
Loading...