Fana: At a Speed of Life!

የሲዳማ ብሄር የዘመን መለወጫ ፍቼ ጫምባላላ በዓልን አስመልክቶ የውይይት መድረክ በኦሮሞ የባህል ማእከል እየተካሄደ ነው

 

አዲስ አበባ ፣ ግንቦት 17፣ 2011 (ኤፍ.ቢ.ሲ) የሲዳማ ብሄር የዘመን መለወጫ ፍቼ ጫምባላላ በዓልን አስመልክቶ የውይይት መድረክ በኦሮሞ የባህል ማእከል እየተካሄደ ነው።

በመድረኩም የፍቼ ጫምባላላ በዓልን በማስመልከት ዶክተር አምባዬ ኡጋቶ የመወያያ ፅሁፍ አቅርበው ውይይት እየተካሄደ ይገኛል።

በዚህ በዓል ላይ ንግግር ያደረጉት የአዲስ አበባ ከተማ ምክትል ከንቲባ ኢንጅነር ታከለ ኡማ ኢትዮጵያዊነት ማንም የሚሰጠን ወይም የሚነፍገን ማንነት ሳይሆን አባቶቻችን በደማቸው ያቆዩልን ማንነታችን ነው ብለዋል፡፡

ኢንጅነር ታከለ ኡማ ጠንካራ በሆነው የህዝቦች መዋደድ እና መተሳሰብ የተጋመደው ኢትዮጵያዊነታችን እንደ ህዝብ እንድንቀራረብ እና ችግሮቻችንን በጋራ እንድንሻገር ጉልበት የሚሆነን ነው ብለዋል፡፡

ታሪካችን እና ማንነታችን ከፍታችን ወደ ሆነው ኢትዮጵያዊነታችን የሚያወጣን መሰላል ነዉ ያሉት ኢንጅነር ታከለ መሰላል መወጣጫ እንደሚያስፈልገው ሁሉ አንድነታችን እና ባህላችን ከፍታችን ወደ ሆነው ኢትዮጵያዊነታችን መወጣጫ መሆኑን ተናግረዋል፡፡

ኢትዮጵያዊነት ደግሞ ማንም የሚሰጠን ወይም የሚነፍገን ማንነት ሳይሆን አባቶቻችን በደማቸው ያቆዩልን ማንነታችን ነው ብለዋል፡፡

አንድነታችንን ከምንጊዜውም በላይ ማጠናከር አለብን ያሉት ኢንጅነር ታከለ ኡማ ለብቻ ስንቆም ግንጥል ጌጥ ፤ አንድ ላይ ስንቆም ግን ውብ ጌጥ ነን ብለዋል፡፡

የጋራ ከተማ የሆነችው አዲስ አበባ የመላው ሃገራችንን ህዝቦች ባህል እና ታሪክ የምታንፀባርቅ ከተማ መሆን እንዳለባት እና የሲዳማ ህዝብም በከተማዋ ማንነቱ እና ታሪኩ እንዲታይ የከተማ አስተዳደሩ አስፈላጊውን ድጋፍ እንደሚያደርግ ተናግረዋል፡፡

ፍቼ ጫምባላላ ከዘመን መለወጫ በዓልነቱ ባሻገር በርካታ ባህላዊ እና ማህብራዊ ፋይዳ ያሉት ሀገር በቀል የሆነ አቆጣጠር እውቀትን አካቶ የያዘ ባህል ነው።

በዓሉ ሰላም፣ መከባበር እና መቻቻል እንዲሰፍን እንዲሁም እርቅ እንዲወርድ የጎሳ መሪዎች እና የበቁ የሀገር ሽማግሌዎች ለህብረተሰቡ ትምህርት የሚሰጥበትም ነው።

በዓሉ በየትኛው ወርና ቀን እንደሚውል አያንቶ ተብለው የሚጠሩ ባህላዊ ሊቃውንት የጨረቃ ምልክትና ኮከብ ቆጠራ ስሌትን በመጠቀም ይወስናሉ።

ለህዝቡም ከአንድ ሳምንት በፊት በዓሉ የሚውሉበት ቀን ይታወጃል።

በዛሬው መድረክ አባገዳዎች እና የሲዳማ የሀገር ሽማግሌዎች/ጪማሳዎች በመሳተፍ ላይ ይግኛሉ።

በተጨማሪም የአዲስ አበባ ምክትል ከንቲባ ኢንጂነር ታከለ ኡማ እና የሲዳማ ዞን ዋና አስተዳዳሪ አቶ ቃሬ ጫውቻ ተገኝተዋል።

በመለሰ ምትኩ

You might also like
Comments
Loading...