Fana: At a Speed of Life!

የሩዋንዳ የዘር ጭፍጨፋ መታሰቢያ የእግር ጉዞ በአዲስ አበባ ተካሄደ

አዲስ አበባ፣ ግንቦት 11፣ 2011 (ኤፍቢሲ) በሩዋንዳ የተፈጸመው የዘር ጭፍጨፋ 25ኛ ዓመት በአዲስ አበባ የእግር ጉዞ በማድረግ ዛሬ ታስቦ ዋለ።

የእግር ጉዞው በኢትዮጵያ የሩዋንዳ ኤምባሲ እና በኢፌዴሪ የውጭ ጉዳይ ሚኒስቴር አስተባባሪነት ነው የተካሄደው።

የእግር ጉዞው መነሻውን ከብሔራዊ ስታዲየም በመጀመር በመስቀል አደባባይ አድርጎ በአፍሪካ የኢኮኖሚክ ኮሚሽን ቀጥሎም በብሔራዊ ቤተ-መንግስት በማድረግ በኢትዮጵያ ሆቴል አድርጎ በብሔራዊ ትያትር በማቅናት ማጠቃለያውን ብሔራዊ ስታዲየም ያደርጋል።

በዚህ የእግር ጉዞ የውጭ ጉዳይ ሚኒስትር ዴኤታ ሂሩት ዘመነ፣ በኢትዮጵያ የሩዋንዳ አምባሳደር ሆፕ ቱሙኩንዴ ጋሳቱራን ጨምሮ የአፍሪካ ህብረት ተወካዮችና ሌሎች የአዲስ አበባ ከተማ ነዋሪዎች ተገኝተዋል።

በዚሁ ወቅት የውጭ ጉዳይ ሚኒስትር ዴኤታ ወይዘሮ ሂሩት ባደረጉት ንግግር ከ25 ዓመት በፊት በሩዋንዳ የዘር መድሎ ችግር በ100 ቀናት ውስጥ ወደ አንድ ሚሊዮን የሚጠጋ ህዝብ ያለቀበትና አስከፊ ችግር ውስጥ የገቡበት ወቅት እንደነበር አስታውሰዋል።

ሩዋንዳውያን ከዚህ አስከፊ ችግር በመማር ከዘር መድሎና መጠላላት ወጥተው ለኑሮ ምቹ የሆነች ሀገር መፍጠር መቻላቸውን ተናግረዋል።

ከሩዋንዳውያን ትምህርት በመውሰድ ሁሉም በይቅር ባይነት መንፈስ በጋራ ሰርቶ መኖርና ትምህርት መውሰድ እንደሚቻል ጠቁመዋል።

ሀገራት በተለያየ አጋጣሚ ችግር ውስጥ ቢገቡም ከችግር መውጣት እንደሚችሉ የሩዋንዳ ክስተት ማሳያ እንደሆነ ሚኒስትር ዴኤታዋ ገልጸዋል።

ኢትዮጵያውያንም እርስ በእርስ በመተሳሰብና በጋራ በመስራት ሀገራቸውን ማሳደግና መለወጥ ላይ እንዲረባረቡ ጥሪ አስተላልፈዋል።

በኢትዮጵያ የሩዋንዳ አምባሳደር ሆፕ ቱሙኩንዴ ጋሳቱራ የኢትዮጵያ መንግስት የሩዋንዳን የዘር ዕልቂት 25ኛ ዓመት መታሰቢያ በአዲስ አበባ እንዲከበር ላደረገው ድጋፍና ትብብር ምስጋናቸውን አቅርበዋል።

የአፍሪካ ሀገራት በሩዋንዳ አጋጥሞ ከነበረው ቀውስ ትምህርት በመውሰድ በአህጉሩ ሰላም እንዲሰፍን መስራት እንዳለባቸው ገልጸዋል።

በሩዋንዳ የቱትሲ ጎሳ አባላት ላይ በፈረንጆቹ 1994 የደረሰውን የዘር ጭፍጨፋ 25ኛ ዓመት መታሰቢያ ምክንያት በማድረግ ነው የእግር ጉዞው የተዘጋጀው።

የጉዞው ዓላማም በጭፍጨፋው የሞቱ ሩዋንዳውያንን ለማሰብና ከዚህ መሰል እልቂት የጸዳች ሩዋንዳን ብሎም አፍሪካን ለመገንባት ያለመ ነው።

 

ምንጭ፦ኢዜአ

You might also like
Comments
Loading...