Fana: At a Speed of Life!

የሀገር ውስጥ ባለሃብቶች በማምረቻው ዘርፍ በስፋት እንዲሰማሩ ማሻሻያዎች እየተደረጉ ነው

 

አዲስ አበባ ፣ ግንቦት 6 ፣ 2011 (ኤፍ ቢ ሲ) የሀገር ውስጥ ባለሃብቶች በማምረቻው ዘርፍ በስፋት እንዲሰማሩ የሚያስችሉ የተለያዩ ማሻሻያዎች እየተደረጉ ነው።
 
ኢትዮጵያ ወደ ውጭ ከምትልካቸው ምርቶች ትልቁን ድርሻ የሚይዘው የማምረቻው ዘርፍ ሲሆን፥ የተሻለውን ገቢ የሚያስገኘውም ይኼው ዘርፍ መሆኑን መረጃዎች ያመለክታሉ።
 
ሀገሪቱ ወደ ኢንዱስትሪ መር ኢኮኖሚ ለምታደርገው ኢኮኖሚያዊ ሽግግርም ትልቅ ተስፋ የተጣለበት ዘርፍ ነው።
 
በዘርፉ የሀገር ውስጥ ባለሃብቶች ተሳትፎ በሚጠበቀው ደረጃ አለመሆኑ በዘርፉ ለተያዘው እቅድ አለመሳካት አንዱ ምክንያት መሆኑ ይነገራል።
 
የንግድ እና ኢንዱስትሪ ሚኒስቴርም ዘርፉ በየአመቱ መሻሻሎችን ቢያሳይም ውጤቱ ግን አመርቂ አለመሆኑን ይገልጻል።
 
የኢንዱስትሪ ፓርኮች ልማት ኮርፖሬሽን ዋና ስራ አስፈፃሚ ለሊሴ ነሚ ከፋና ብሮድካስቲንግ ኮርፖሬት ጋር በነበራቸው ቆይታ በኢንዱስትሪ ፓርኮች እንኳን የሀገር ውስጥ ባለሃብቶች ተሳትፎ አነስተኛ መሆኑን ይናገራሉ።
 
የብድር አሰጣጥ ላይ ለሚስተዋለው ችግር አንዱ እና ዋነኛው ምክንያት መሆኑንም ነው ዋና ስራ አስፈፃሚዋ የሚናገሩት።
 
ከብድር አሰጣጥ በተጨማሪም የግብአት እጥረት እና ሌሎች ከፈፃሚ አካላት ጋር የተያያዙ ችግሮች ባለሃብቶቹ ወደ ዘርፉ እንዳይገቡ ከሚያደርጓቸው ምክንያቶች ውስጥ ይጠቀሳሉ።
 
የኢንቨስትመንት ኮሚሽንም ባለሃብቶቹ ያሉባቸውን ችግሮች ለመፍታት ከሚመለከታቸው ተቋማት ጋር እየሰራ መሆኑን ይገልጻል።
 
የኢንቨስትመንት ኮሚሽን ኮሚሽነር አቶ አበበ አበባየሁ ባለሃብቶቹ በስፋት እንዲሰማሩ ለማድረግ ከንግድ እና ኢንዱስትሪ ሚኒስቴር ጋር እየሰሩ መሆኑን ተናግረዋል።
 
ባለሃብቶቹ ውጤታማ የሚሆኑባቸውን አሰራሮች በየተቋማቱ ማስቀመጥን ጨምሮ በርካታ ስራዎች እየተሰሩ መሆኑን አንስተዋል።
 
በተለይም ከብድር አሰጣጥ ጋር ተያይዞ ልማት ባንክ በተለየ የብድር አቀራረብ ለባለሃብቶቹ እገዛ እንዲያደርግ እየተደረገ መሆኑንም ጠቅሰዋል።
 
ይህን ተከትሎም የሀገር ውስጥ ባለሃብቶች በተለያዩ የኢንዱስትሪ ፓርኮች በዘርፉ ለመሳተፍ ፍላጎት እያሳዩ ነውም ብለዋል።
 
ከዚህ ባለፈም የሀገር ውስጥ ባለሃብቶች ራሳቸውን ችለው ከመስራት ጎን ለጎን ከውጭ ባለሃብቶች ጋርም በጋራ የሚሰሩበት ሁኔታ እየተመቻቸ መሆኑንም ገልጸዋል።
 
በዙፋን ካሳሁን
You might also like
Comments
Loading...