Fana: At a Speed of Life!

ከ3 ሺህ በላይ የሥነ ምድር መረጃ ለተጠቃሚዎች መሰራጨቱ ተገለፀ

አዲስ አበባ፣ ግንቦት 5፣ 2011 (ኤፍ.ቢ.ሲ) በተያዘው ዓመት ከ3 ሺህ በላይ የሥነ-ምድር መረጃዎች ለተጠቃሚዎች ማሰራጨት መቻሉን የኢትዮጵያ ጂኦሎጂካል ሰርቬይ አስታወቀ።

የኢትዮጵያ ጂኦሎጂካል ሰርቬይ የኮሙዩኒኬሽን ጉዳዮች ዳይሬክተር አቶ ታምሩ መርሻ ለፋና ብሮድካስቲንግ ከርፖሬት እንደገለጹት፥ ከ3ሺህ በላይ የሥነ-ምድር መረጃ ለተጠቃሚዎች ማሰራጨት መቻሉን ተናግረዋል።

ከዚህ ባለፈም በአሁን ወቅት ለማዕድን አለኝታ ተስፋ ሰጭ በሆኑ ቦታዎች የጂኦ-ሳይንስ ማለትም የጂኦሎጂ፤ የጂኦ ኬሚስትሪና የጂኦ ፊዚካል ዝርዝር ጥናት የተካሄደ ሲሆን፥ የ5 አለኝታ ቦታዎች ዝርዝር ጥናት መጠናቀቁንም አንስተዋል።

በተጨማሪም የ12 አለኝታ ቦታዎች ዝርዝር ጥናት እየተሰራ ይገኛል ነው ያሉት።

በጀት ዓመቱ የ46 የማዕድን አለኝታ ቦታዎች ዝርዝር ጥናት ለማጠናቀቅ ዕቅድ ተይዞ እየተሰራ ሲሆን፥ ቀሪውን 28 ዝርዝር የአለኝታ ቦታዎች ጥናት በቀሪ ሁለት ወራት ለማጠናቀቅ ርብርብ እየተደረገ ይገኛል ብለዋል አቶ ታምራት።

በዚህ ጥናት በዋናነት ለሥራ ዕድል ፈጠራና ለውጭ ምንዛሬ አስተዋፅኦ ያላቸው የደለል ወርቅ አለኝታ ቦታዎች ቅድሚያ ተሰጥቶ እየተሰራ መሆኑን ጠቁመዋል።

በሌላ በኩል ተቋሙ በበጀት ዓመቱ እስካሁን ከ2 ሺህ በላይ የተለያዩ የጂኦ ኬሚካል ላብራቶሪ አገልግሎት እና ከ1 ሺህ 200 በላይ የጂኦ-ቴክኒክና ሚኒራሎጂ ላብራቶሪ አገልግሎት ለመስጠት መቻሉን ገልጸዋል።

በታሪክ አዱኛ

 

You might also like
Comments
Loading...