Fana: At a Speed of Life!

ኢትዮጵያ የ2020 የዓለም ኢኮኖሚ ፎረም የአፍሪካ ጉባኤን ለማስተናገድ የመግባቢያ ስምምነት ተፈራረመች

አዲስ አበባ፣ ግንቦት 7፣ 2011 (ኤፍ.ቢ.ሲ) ኢትዮጵያ የ2020 የዓለም ኢኮኖሚ ፎረም የአፍሪካ ጉባኤን ለማስተናገድ የመግባቢያ ስምምነት ተፈራረመች።

የመግባቢያ ስምምነቱን ጠቅላይ ሚኒስትር ዶክተር ዐቢይ አህመድና የዓለም ኢኮኖሚ ፎረም ፕሬዚዳንት ቦርግ ብሬንደ ተፈራርመዋል።

የ2019ኙ የዓለም የኢኮኖሚ ፎረም ባሳለፍነው ጥር ወር በስዊዘርላንድ ዳቮስ ሲካሄድ፥ የቀጣዩ ዓመት የፎረሙ የአፍሪካ ጉባኤ በኢትዮጵያ እንዲካሄድ መወሰኑ ይታወቃል።

ኢትዮጵያ በጠቅላይ ሚኒስትር ዶክተር ዐቢይ አህመድ አመራር ለአፍሪካ ሀገራት ምሳሌ የሆነ ለውጥ እያሳየች መሆኑን የተናገሩት የፎረሙ ፕሬዚዳንት፤  የአፍሪካ ጉባኤን በኢትዮጵያ ለማዘጋዘጀት መወሰኑ ትክክለኛ መሆኑን ተናግረዋል።

ኢትዮጵያ ከጀመረቻቸው የኢኮኖሚ ማሻሻያዎች በተጓዳኝ በቀጠናው ሰላምና መረጋጋት እንዲሰፍን እያደረገች ያለው ጥረት የሚደነቅ መሆኑንም አንስተዋል።

በፎረሙ ለመካፈል ወደ ኢትዮጵያ የሚመጡ የትላልቅ ኩባንያዎች ስራ አስፈጻሚዎችና ባለሃብቶችም በኢትዮጵያ ኢኮኖሚ ውስጥ መዋዕለ ንዋያቸውን እንዲያፈሱና በስራ ዕድል ፈጠራም መንግስትን እንዲያግዙ ዕድል ይፈጥራል ብለዋል ፕሬዚዳንቱ።

እንደ ምዕራባውያኑ አቆጣጠር በ2020 መስከረም ወር መጀመሪያ ላይ የሚካሄደው የፎረሙ የአፍሪካ ጉባኤ ውጤታማ እንደሚሆንም እተማመናለሁ ሲሉ በኢትዮጵያ ላይ ያላቸውን ዕምነት ገልጸዋል።

የዓለም ኢኮኖሚ ፎረም የአፍሪካ ጉባኤ ዳቮስ ላይ ከሚካሄደው የዓለም ኢኮኖሚ ፎረም በተጓዳኝ በየዓመቱ በተለያዩ የአፍሪካ ሀገራት የሚካሄድ ሲሆን፥ የ2019ኙ ጉባኤም በመጭው መስከረም ከ4 እስከ 6 በደቡብ አፍሪካ ኬፕታውን እንደሚካሄድ ይታወቃል።

 

በባሃሩ ይድነቃቸው

You might also like
Comments
Loading...