Fana: At a Speed of Life!

ኢትዮጵያ ሁሉንም የኢትዮጵያ ብሄር ብሄረሰቦች እንደትመስል መስራት ይገባል – አቶ ሽመልስ

አዲስ አበባ ፣ ግንቦት 16፣ 2011 (ኤፍ.ቢ.ሲ) የኦሮሚያ ክልል ምክትል ርዕሰ መስተዳድር አቶ ሽመልስ አብዲሳ ኢትዮጵያ ሁሉንም የኢትዮጵያ ብሄር ብሄረሰቦች የምትወክል እንድትሆን እንደሚገባ ተናገሩ።

የኦሮሚያና አፋር ህዝቦች የህዝብ ለህዝብ መድረክ በአዳማ ከተማ እየተካሄደ ይገኛል፡፡

በዚህ መድረክ የኦሮሚያ ክልል ምክትል ርዕሰ መስተዳድር አቶ ሽመልስ አብዲሳና የአፋር ክልል ርዕሰ መስተዳድር አቶ አወል አርባን ጨምሮ የሁለቱም ህዝቦች ተወካዮች በተገኙበት ነው በመካሄድ ላይ የሚገኘው፡፡

በመድረኩ ላይ ንግግር ያደረጉት የኦሮሚያ ክልል ምክትል ርዕሰ መስተዳድር አቶ ሽመልስ፥ መሰል የህዝብ ለህዝብ መድረኮች ኢትዮጵያን ጠንካራ ከማድረግ ባሻገር ለምስራቅ አፍሪካ ከፍተኛ ጠቀሜታ አለው ብለዋል፡፡

ከዚህ ባለፈም ኢትዮጵያ የሁሉንም ፍላጎት የምታሟላ እንድትሆን ማድረግ የሁሉም ዜጋ ሀላፊነት መሆኑንም ተናግረዋል፡፡

ምክትል ርዕሰ መስተዳድሩ በታሪክ ውስጥ የነበሩ ስህተቶችን በማረም በሁሉም ህዝቦች መካከል ያለው ግንኙነት እንዲጠናከር መትጋት እንደሚገባ ጠቁመዋል፡፡

የኦሮሞ እና የአፋር ህዝብ በአንድ ደም የተሳሰረ ነው ያሉት ምክትል ርዕሰ መስተዳድሩ የአዋሽ ወንዝም የሁለቱ ህዝቦች ደም ነው ብለዋል፡፡

የአዋሽ ወንዝ የኦሮሞ ህዝብ ሲከፋው፣ ሲያዝንና ሲደሰት ለአፋር መልዕክት ያደርሳል ሲሉም የሁለቱን ህዝቦች አንድነት ገልጸዋል።

የአፋር ክልል ርዕሰ መስተዳድር አቶ አወል አርባ በበኩላቸው “ወደ አዳማ የመጣነው ተግጭቶ ለመታረቅ፤ ታርቆም ለመጋጨት ሳይሆን በቀጣዩ ትውልድ ሰላምና ልማት ላይ በምን መልኩ መጓዝ እንዳለብን ለመመካከር ነው” ብለዋል፡፡

በዚህም የተሻለ የሰው ኃይልና ተፈጥሮ ካለው የኦሮሚያ ክልል ጋር በተለይም መነሻና መድረሻውን ኦሮሚያና አፋር ክልል ያደረገውን የአዋሽ ወንዝ በጋራ ለማልማት እንደሚሰሩ ተናግረዋል፡፡

እንደ ሃገርም ወቅቱ የሚጠይቀውን የአንድነት መንፈስ በማጠናከርም ስለ በሁለቱ ክልሎች ብቻ ሳይሆን በሁሉም የኢትዮጵያ አካባቢዎች ሰላም እንዲሰፍን በህብረት መስራት እንደሚያስፈልግም ነው አቶ አወል የገለፁት፡፡

 

 

በሶዶ ለማና ኤፍሬም ምትኩ

 

You might also like
Comments
Loading...