Fana: At a Speed of Life!

አሜሪካ በኢራቅ የሚገኙ ዜጎቿ ሀገሪቱን ለቀው እንዲወጡ አሳሰበች

አዲስ አበባ፣ ግንቦት 7፣ 2011 (ኤፍ.ቢ.ሲ) አሜሪካ ከአደጋ ጊዜ ሰራተኞች በስተቀር በኢራቅ የሚገኙ የመንግስት ተቀጣሪ ሰራተኞች በሙሉ ሀገሪቱን ለቀው እንዲወጡ አሳሰበች።

ውሳኔው የተላለፈው በኢራቅ የሚገኘው የአሜሪካ ኤምባሲ ዜጎች ወደ ኢራቅ እንዳይጓዙ መልዕክት ካስተላለፈ ከቀናት በኋላ ነው ተብሏል።

በኢራቅ ኢርቢል የሚገኘው ቆንጽላም በኢራቅ ለሚገኙ ዜጎቹ ድንገተኛ ጊዜ አገልግሎት መስጠቱን እየቀነሰ መምጣቱን አስታውቋል።

እንዲሁም በባግዳድና ኢርቢል ቆንጽላዎች የሚገኙ ሰራተኞችም የሕዝብ ትራንስፖርት በመጠቀም በአስቸኳይ እንዲወጡ ትዕዛዝ ተላልፏል።

አሜሪካ እዚህ ውሳኔ ላይ የደረሰችው ሰሞኑን ከኢራን ጋር በገባችው እሰጣገባ ምክንያት ነው ተብሏል።

የአሜሪካ መከላከያ ሚኒስቴር ትናንት እንዳስታወቀው በቀጠናው በኢራን የሚደገፉ ኃይሎች እያንዣበበ የሚገኘው የጸጥታ ስጋት እየጨመረ መሆኑን ገልጿል።

የኢራቅ ጠቅላይ ሚኒስትር አዴል አብዱል ማህዲ በበኩላቸው በየትኛውም ወገን ስጋት የሚሆን እንቅስቃሴ የለም ሲሉ ትናንት ተናግረዋል።

ከጠቅላይ ሚኒስትሩ በተጨማሪም የብሪታንያ አንድ ጀነራል በአካባቢው እየተስፋፋ የመጣ ስጋት የለም ሲሉ መናገራቸውም ተገልጿል።

ሆኖም ስቴት ዲፓርትመንት ኢራን የእጅ አዙር ጥቃት ልትሰነዝር ትችላለች በሚል ዜጎቿ ሀገሪቷን በፍጥነት ለቀው እንዲወጡ አሳስባለች።

ባለፈው ዓመት አሜሪካ ከ2015ቱ የኢራን ኒውክሌር ስምምነት ራሷን ካገለለች በኋላ ከዚህ ቀደም የተነሳላትን ማዕቀብ ህዳር ወር ላይ መልሳ መጣሏ ይታወሳል።

ይህንንም ተከትሎ ታዲያ ኢራን ከቀሪ የስምምነቱ አባል ሀገራት ጋር የ2015ቱን ስምምነት ለመቀጠል ተስማምታ የነበረ ቢሆኑም ሰሞኑን ለሀገራቱ የ60 ቀናት ቅድመሁኔታ በማስቀመጥ ዳግም ዩራኒየም ለማበልጸግ ማስቧን አስታውቃለች።

ምንጭ፦ቢቢሲና አልጀዚራ

በአብርሃም ፈቀደ

You might also like
Comments
Loading...