Fana: At a Speed of Life!

ቴሬዛ ሜይ ሃገራቸውን ከህብረቱ ለመነጠል በደረሱት ስምምነት ላይ በቀጣዩ ወር ድምጽ ሊያሰጡ ነው

አዲስ አበባ ፣ ግንቦት 7 ፣ 2011 (ኤፍ ቢ ሲ) የብሪታንያዋ ጠቅላይ ሚኒስትር ቴሬዛ ሜይ ሃገራቸውን ከአውሮፓ ህብረት መነጠል በደረሱት ስምምነት ላይ ድምጽ ሊያሰጡ ነው።

ጠቅላይ ሚኒስትሯ ሃገራቸው ከህብረቱ ጋር ፍቺ ለመፈጸም የደረሰችውን ስምምነት ተፈጻሚ ለማድረግ በቀጣዩ ወር በፓርላማ አባላቱ ድምጽ ያሰጣሉ።

ብሪታንያ ከአውሮፓ ህብረት ለመነጠል የገባችው ስምምነት ባለፈው መጋቢት ወር መጨረሻ ላይ ተፈጻሚ መሆን ነበረበት።

ይሁን እንጅ ጠቅላይ ሚኒስትሯ የገቡት ስምምነት በፓርላማ አባላቱ ውድቅ መደረጉን ተከትሎ የፍቺው ሂደት ለቀጣዩ ጥቅምት ወር ተራዝሟል።

አሁን ላይም ጠቅላይ ሚኒስትሯ የፓርላማ አባላቱ በቀጣዩ ወር እርሳቸው ከህብረቱ ጋር በደረሱት የፍቺ ስምምነት ላይ ድምጽ እንዲሰጡበት የመጨረሻ ሙከራ ያደርጋሉ ነው የተባለው።

ይህም የፓርላማ አባላቱ ለእረፍት ከመበተናቸው በፊት እንደሚካሄድ ተገልጿል።

ሜይ የሚያቀርቡት አዲስ እቅዳቸው ተቀባይነት ካጣ ብሪታንያ ስምምነቱን የመጣስ አልያም ለሃገራት ከህብረቱ የመነጠል መብት የሚሰጠውን አንቀጽ 50ን ልትሰርዝ እንደምትችል ከቤተ መንግስት የሚወጡ መረጃዎች ያመላክታሉ።

ይህም የሚሆነው የአውሮፓ ህብረት ከዚህ በኋላ ለብሪታንያ ተጨማሪ ጊዜ እንደማይሰጥ መግለጹን ተከትሎ ነው ተብሏል።

 

 

ምንጭ፦ ቢቢሲ

You might also like
Comments
Loading...