Fana: At a Speed of Life!

ተመድ 149 ስደተኞችን ከሊቢያ የስጋት ቀጠናዎች ወደ ጣሊያን ማዛወሩን ገለጸ

አዲስ አበባ፣ ግንቦት 23፣ 2011 (ኤፍ.ቢ.ሲ) የተባበሩት መንግስታት ድርጅት (ተመድ) 149 ስደተኞችን ከሊቢያ የስጋት ቀጠናዎች ወደ ጣሊያን ማዛዎሩን ገለጸ፡፡

የተባበሩት መንግሰታት ድርጅት ከሊቢያና ጣሊያን ባለስልጣናት ጋር በመተባበር ከሊቢያ የግጭት ቀጠናዎች ውስጥ 149 ስደተኞችን ወደ ጣሊያን ማዛወሩ ተነግሯል፡፡

በሊቢያ ምስራቃዊ ክፍል በሚንቀሳቀሰው ወታደራዊ ሃይልና መቀመጫውን ትሪፖሊ ባደረገውና በመንግስታቱ ደርጅት ድጋፍ በሚደረግለት መንግስት መካከል የተቀሰቀሰው ግጭት የሀገሪቱን የደህንነት ጉዳይ አሳሳቢ እንዳደረገው ይነገራል፡፡

በዚህም በሀገሪቱ ውስጥ የሚገኙ ስደተኞችና ጥገኝነት ጠይቀው በተለያዩ መጠለያዎች የሚገኙ 149 ያህል ሰዎች በመንግስታቱ ድርጅት፣ በሊቢያና ጣሊያን ባለስልጣናት ትብብር ወደ ጣሊያን መዛወራቸው የመንግስታቱ ድርጅት የስደተኞች ከፍተኛ ኮሚሽን ገልጸዋል፡፡

ከሊቢያ ወደ ጣሊያን የተዛወሩት ስደተኞች የአፍሪካ ሀገራት ዜጎች ሲሆኑ 65 ያህሉ ህፃናት መሆናቸው ነው የተነገረው።

ከዚህም ሌላ መዳረሻቸውን ኖሮዌይ አድርገው የሚንቀሳቀሱ 65 የሶሪያ፣ ሱዳንና ሶማሌ ስደተኞች ከትሪፖሊ ወጥተው ሮማኒያ ውስጥ ቲሚሷራ ከተማ ወደ ሚገኘው የመንግስታቱ የስደተኞች ማቆያ ጣቢያ ተልከዋል።

በአውሮፓውያኑ 2011 የሊቢያ የቀድሞ ፕሬዚዳንት ሙዓመር ጋዳፊ ከስልጣን ከወረዱ በኋላ ሰላምና መረጋጋት የራቃት ሊቢያ፥ ህገ ወጥ ስደተኞች የሜዲትራንያንን ባህር ለማቋረጥ ይጠቀሙባታል።

በዚህም ለቢያ በሺህዎች በሚቆጠሩ ህገ ወጥ ስደተኞች መጨናነቋም ይነገራል።

ምንጭ፡- ሲ ጂ ቲ ኤን

You might also like
Comments
Loading...