Fana: At a Speed of Life!

ባለፉት 3 ወራት በኢትዮጵያ ላይ የተቃጣው የመረጃ መረብ ጥቃት ከ3 እጥፍ በላይ ጨምሯል

አዲስ አበባ፣ ግንቦት 16፣2011 (ኤፍ ቢሲ) በያዝነው ዓመት ባለፉት ሶስት ወራት በኢትዮጵያ ላይ የተቃጣው የመረጃ መረብ ጥቃት ከ3 እጥፍ በላይ መጨመሩን የኢንፎርሜሽን መረብ ደህንነት ኤጀንሲ ገለጸ።

በሀገሪቱ በ2011 ዓ.ም የተሰነዘሩ የመረጃ መረብ ጥቃቶች ካለፉት ሁለት ሩብ አመታት አንጻር ሲታይ በ3ኛው ሩብ ዓመት በሶስት እጥፍ አድጓል፡፡

በሀገሪቱ ያሉ ወሳኝ መሰረተ-ልማቶች ላይ ያነጣጠረው ይህ ጥቃት የአጥፊ ሶፍትዌሮችን ማሰራጨት፣ ድረ-ገጾችን ማጥቃት፣ የመረጃ መረብ ትንኮሳዎችን መፈጸምና መሰረተ-ልማቶችን ለማጥቃት ቅኝቶችን ማድረግ ወንጀለኞቹ ያነጣጠሩባቸው መስኮች መሆናቸው ተገልጿል።

እነዚህ የተሰነዘሩ እና ሊሰነዘሩ የነበሩ የመረጃ መረብ ጥቃቶችም በኢንፎርሜሽን መረብ ደህንነት ኤጀንሲ አማካኝነት መክሸፋቸው ነው የተገለጸው።

ባለፉት ዘጠኝ ወራት ብቻ በሀገሪቱ 488 አደገኛ የሚባሉ የጥቃት ሙከራዎች የተፈጠሩ ሲሆን፥ በድረ ገጾች ላይ የተቃጣው ከፍተኛውን ድርሻ ይወስዳል ተብሏል።

በዚህ መሰረትም በድረ ገጾች ላይ የተቃጣው ጥቃት ከአጠቃላዩ 39 ነጥብ 9 በመቶ የሚሆነውን ይይዛል ተብሏል።

በወሳኝ መሰረተ-ልማቶች ላይ ጥቃት ለመፈጸም የተደረጉ ቅኝቶች ደግሞ 17 ነጥብ 6 በመቶ እና ወዳልተፈቀደ የኮምፒዩተር ስርዓቶች ሰርጎ የመግባት ሙከራ በ14 ነጥብ 95 በመቶ በመሆን ተከታዩን ደረጃ ይዘዋል።

አብዛኛዎቹ የመረጃ መረብ ጥቃት እንቅስቃሴዎች ከመፈጸማቸው በፊት በቅኝት ላይ ሳሉ መግታት መቻሉንም ኤጀንሲው ገልጿል።

ለጥቃት ሙከራው የተጋለጡ ሲስተሞች፣ የኮምፒዩተር ስርዓቶች እና መጠቀሚያ መሳሪያዎችን ክፍተት በመለየትም ክፍተቱን የመሙላት ስራ መከናወኑን ከኢንፎርሜሽን መረብ ደህንነት ኤጀንሲ ያገኘነው መረጃ ያመላክታል።

በኢትዮጵያ ከጊዜ ወደ ጊዜ ከኢንተርኔት ጋር የተገናኙ ስርዓቶች እንዲሁም ወሳኝ የሚባሉ መሰረት ልማቶች ከኮምፒውተር ጋር የተገናኙ በመሆናቸው ከፍተኛ ጥንቃቄ ሊደረግ እንደሚገባም ኤጀንሲው አሳስቧል

 

You might also like
Comments
Loading...