Fana: At a Speed of Life!

በተባበሩት አረብ ኤሚሬቶች ወታደራዊና የአደጋ ጊዜ ተሽከርካሪዎቸን የሚያመርተው ስትሬት ግሩፕ ኩባንያ በኢትዮጵያ እንዲሰማራ የሚያግባባ ጉብኝት ተካሄደ

አዲስ አበባ ፣ ሚያዚያ 29፣ 2011 (ኤፍ ቢ ሲ) በተባበሩት አረብ ኤሚሬቶች የኢትዮጵያ ባለሙሉ ስልጣን አምባሳደር ሱሌይማን ደደፎ በሀገሪቱ ወታደራዊ፣ ለደህንነት አገልግሎት የሚውሉ እና ሌሎች ሲቪል ተሽከርካሪዎችን የሚያመርተውን ስትሬት ግሩፕ ኩባንያን ጎበኙ።

የአምባሳደሩ ጉብኝትም ለኩባንያው በኢትዮጵያ ያለውን የኢንቨስትመንት አማራጮችን ማስተዋወቅ እና ወደ ኢትዮጵያም በመምጣት መዋእለ ንዋዩን እንዲያፈስ ለማግባባት ያለመ መሆኑ ተጠቅሷል።

አምባሳደር ሱሌይማን ከኩባንያው ዋና ዳይሬክተር ሩሴል አርኖት ጋር ከተወያዩ በኋላ በጋራ በሰጡት መግለጫ ቆይታቸው የተሳካ እንደነበረ አስታውቀዋል።
በጥቂት ቀናት ውስጥም ኩባንያው ወደ ኢትዮጵያ አንድ ልዑክ በመላክ ያለውን የኢንቨስትመንት አማራጮችን እንደሚያጠና ነው የተገለፀው።

ኢትዮጵያ ያለችበት አካባቢም ኩባንያው ማምረቻውን ቢተክል በቀላሉ ወደ ሌሎች የአፍሪካ ገበያዎች ምርቶቹን እንዲልክ የሚያደርግ መሆኑም ተመልክቷል።

አምባሳደሩ ከጉብኝታቸው በኋላ እንዳሉትም፥ ኩባንያው ወደ ኢትዮጵያ አጥኚ ቡድን በመላክ የሚያገኘውን ውጤት መሰረት አድርጎ በሀገሪቱ መዋዕለ ንዋዩን እንደሚያፈስ እምነት እንዳላቸው ተናግረዋል።

በመካከለኛው መስራቅ ሀገራት ኩባንያው ወታደራዊ ተሽከርካሪዎችን አምርቶ ከማቅረብ ባለፈ የሲቪል ተሽከርካሪዎችን በተለያየ መልኩ ደረጃቸውን አሳድጎ የማቅረብ ስራዎችንም ያከናውናል።

ኩባንያው ለአደጋ ጊዜ የሚያስፈልጉ የተለያዩ ተሽከርካሪዎችን በማምረትም ይታወቃል።

በአንዱዓለም ሽመልስ

You might also like
Comments
Loading...