Fana: At a Speed of Life!

በሱዳን ወታደሩና ተቃዋሚ ኃይሎች በሦስት ዓመት የሽግግር ጊዜ ላይ ተስማሙ

አዲስ አበባ፣ ግንቦት 7፣ 2011 (ኤፍ.ቢ.ሲ) የሱዳን ወታደራዊ አመራሮች በሀገሪቱ ሕዝባዊ አስተዳደር ለመመስረት የሚያስችል የሦስት ዓመት የሽግግር ጊዜ እንዲኖር ከተቃዋሚ አመራሮች ጋር መስማማታቸውን አስታወቁ።

ሁለቱ ወገኖች በጋራ በሰጡት ጋዜጣዊ መግለጫ በ24 ሰዓታት ውስጥ የስልጣን መጋራት ስምምነት ላይ እንደሚደርሱ አብራርተዋል።

በስምምነቱ ውስጥም ሱዳንን እስከ ምርጫ ድረስ የሚያስተዳድር አዲስ ምክር ቤት ይቋቋማል ብለዋል።

በመግለጫቸው የሽግግር ምክር ቤቱ 300 አባላት እንደሚኖሩት ጠቅሰው፥ሁለት ሦስተኛ የሚሆነው መቀመጫ በሽግግሩ የህግ መወሰኛ ምክር ቤት አባላት ሲያዝ ቀሪዎቹ ደግሞ የሽግግሩ ምክር ቤት አባላት ባልሆኑ ፓርቲዎች ይያዛሉ ተብሏል።

ከስምምነቱ ቀደም ብሎ ወታደራዊ ምክር ቤቱ ሁለት ዓመት የሽግግር ጊዜ እንዲቀመጥ ዕቅድ ቢኖረውም፥ተቃዋሚዎቹ ደግሞ አራት ዓመታት የሽግግር ጊዜ እንዲኖር ነድፈው ነበር፤ በመጨረሻም ሁለቱ ወገኖች በሦስት ዓመታት እንዲጸና መወሰናቸው ተነግሯል።

ሆኖም ለተቃውሞ የወጡ ሰልፈኞች ሕዝባዊ አስተዳደር እንዲመሰረትና ጊዜ እንዲያጥር በየአደባባዮቻቸው ፍላጎታቸውን ሲገልጹ ሰንብተዋል።

ሕዝባዊ መንግስት እንዲመሰረት በየአደባባዮቹ ላይ ድምጻቸውን የሚያሰሙ የተቃውሞ ድምጾች በበረቱበት በዚህ ወቅት ከስምምነቱ ቀደም ብሎ አምስት ሰዎች ካርቱም ላይ መገደላቸውም ተሰምቷል።

በታህሳስ ወር የአልበሽር አስተዳደር የዳቦ ዋጋን በሦስት እጥፍ በመጨመሩ የተነሳው ተቃውሞ ሚያዝያ መጀመሪያ ላይ ወታደሩ በሽርን በማስወገድ የመሪነት ቦታውን መያዙ ይታወሳል።

በትናትናው ዕለትም አልበሽር ለተቃውሞ በወጡ ሰላማዊ ሰዎች ላይ ጣልቃ በመግባት ለዜጎች ህልፈት ምክንያት ናቸው በሚል ክስ ተመስርቶባቸዋል።

ምንጭ፦ቢቢሲ
በአብርሃም ፈቀደ

You might also like
Comments
Loading...