Fana: At a Speed of Life!

ቅዱስ ጊዮርጊስ ከአሰልጣኝ ስቴዋርት ሀል ጋር ተለያየ

አዲስ አበባ፣ ግንቦት 7፣ 2011 (ኤፍ.ቢ.ሲ) የቅዱስ ጊዮርጊስ አሰልጣኝ ስቴዋርት ሀል በፈቃደቸው ከክለቡ ጋር ተለያዩ።

አሰልጣኙ ከቅዱስ ጊዮርጊስ ጋር ለመለያየት በትናትናው ዕለት ጥያቄ ማቅረባቸው የሚታወስ ሲሆን፥ ጥያቄያቸው በክለቡ ተቀባይነት ማግኘቱ ታውቋል።

አሰልጣኙ በቅዱስ ጊዮርጊስ ለተደረገላቸው ትብብር ምስጋና ያቀረቡ ሲሆን፥ የቅዱስ ጊዮርጊስ ስፖርት ማህበር ስራ አመራር ቦርድ ትናንት ከሰዓት ባካሄደው አስቸኳይ ስብሰባ የአሰልጣኙን መልቀቂያ ተቀብሏል።

እንግሊዛዊው አሰልጣኝ በዓመቱ መጀመሪያ ላይ ፖርቱጋላዊው ቫዝ ፒንቶን ተክተው የቅዱስ ጊዮርጊስ አሰልጣኝ ሆነው የቆዩ ቢሆንም፥ ቡድኑ በተደጋጋሚ ነጥቦች እየጣለ ከዋንጫው ፉክክሩ መራቁ የአሰልጣኙን ቆይታ ጥቃቄ ምልክት ውስጥ ከትቶት ነበር።

አሰልጣኙ ባሳለፍነው እሁድ ቅዱስ ጊዮርጊስ ከደቡብ ፖሊስ በሜዳው ያለ ጎል አቻ ከተለያየበት ጨዋታ በኋላ በሰጡት አስተያየትም ሁሉንም የቡድኑን ተጫዋቾች በተለያየ ጊዜ ቢሞክሩም ለውጥ አለማምጣቱን ጠቅሰው፥ “ክለቡን ወደ ፊት ለማራመድ እና ለክለቡ ጥቅም ስል ነገ የራሴን ውሳኔ እወስናለው። ” ማለታቸውን ሶከር ኢትዮጵያ በዘገባው አስታውሷል፡፡

You might also like
Comments
Loading...