Fana: At a Speed of Life!

ሰሜን ኮሪያ አሜሪካ ያገተችባትን መርከብ በፍጥነት እንድትለቅ አስጠነቀቀች

አዲስ አበባ፣ ግንቦት 6፣ 2011(ኤፍ.ቢ.ሲ) ሰሜን ኮሪያ ዩናይትድ ስቴትስ በህገ ወጥ መንገድ ያገተችባትን የጭነት መርከብ በፍጥነት እንድትለቅ አስጠንቅቃለች ።

አሜሪካ ባሳለፍነው ሳምንት ንብረትነቷ የሰሜን ኮሪያ የሆነችን የጭነት መርከብ ማገቷ ይታወሳል።

ዋሽንግተን የሰሜን ኮሪያን የጭነት መርከብ ያገተችው ሀገሪቱ በተባበሩት መንግስታት ድርጅትና በአሜሪካ የተጣለባትን ማዕቀብ በመጣስ በህገ ወጥ መንገድ  የድንጋይ ከሰል ስታጓጉዝ በመያዟ ነው ተብሏል።

ክስተቱን  ተከትሎም የሰሜን ኮሪያ  የውጭ ጉዳይ ሚኒስትር ቃል አቀባይ  በጉዳዩ  ዙሪያ ለኮሪያ ማዕከላዊ  የዜና ወኪል መግለጫ ሰጥተዋል።

ቃል አቀባዩ በመግለጫቸው አሜሪካ  ባለፍው ሳምንት ያለ ምንም  ምክንያት ያገተችባትን የጭነት መርከብ በፍጥነት እንድትለቅ አስጠንቅቀዋል።

ድርጊቱም የሀገራቱ መሪዎች ባለፈው ሰኔ ወር ላይ ያደረጉትን ስምምነት የሚጥስ  መሆኑን ነው ቃል አቀባዩ የተናገሩት።

አሜሪካ  የጭነት መርከቧን ያገተችበትን ምክንያት ውድቅ ያደረጉት ቃል አቀባዩ ፥ድርጊቱን ህገ ወጥ ዝርፊያ ሲሉ ኮንነዋል።

አሜሪካ ፕዮንግያንግን በሀይል ለማንበርከክ የምታደርገው ሙከራም ከንቱ ድካም  ከመሆኑ ባሻገር ትልቅ ስህተት መሆኑንም አስምረውበታል።

በቀጣይም ሰሜን ኮሪያ ዋሽንግተን በየጊዜው የምታሳየውን የባህሪ ለውጥና የአቋም መዋዠቅ በአንክሮ የምትከታተል መሆኑን ጠቁመዋል።

ምንጭ ፥ሲ ጂ ቲ ኤን

You might also like
Comments
Loading...