Fana: At a Speed of Life!

“ለግብርና ትራንስፎርሜሽን የአመራሩ ሚና” በሚል መሪ ቃል የውይይት መድረክ በአዳማ እየተካሄደ ነው

አዲስ አበባ ፣ ግንቦት 17፣ 2011 (ኤፍ.ቢ.ሲ) “ለግብርና ትራንስፎርሜሽን የአመራሩ ሚና” በሚል መሪ ቃል በአዳማ አባገዳ አዳራሽ የውይይት መድረክ እየተካሄደ ይገኛል።

በመድረኩ ላይ የተገኙት የኢፌዴሪ ምክትል ጠቅላይ ሚኒስትር አቶ ደመቀ መኮንን የግብርና ምርትና ምርታማነት ላይ የሚሰሩ ባለደርሻ አካላት ዘርፉን ማዘመን ላይ በትብብር ሊሰሩ እንደሚገባ ነው የተናገሩት።

ግብርና የሀገሪቱ ወሳኝ የኢኮኖሚ መሰረት እንደመሆኑ አመራሩ ትኩረት ሰጥቶት በርብርብ ዘርፉን ለማሻገር ሊሰራ ይገባልም ብለዋል።

ዘርፉን ከዝናብ ጥገኝነት በማላቀቅ ወደ መስኖ ልማት ለማሻገር ያሉትን በጎ ጅምሮች እና ተግዳሮቶችን በመለየት ሳይንሳዊ በሆነ መንገድ መስራት እንደሚገባም አቶ ደመቀ አሳስበዋል።

የዘርፉ አመራር ከግብርና ጋር በሳይንሳዊ መንገድ ትስስር ያለው ባለመሆኑ የሚፈለገው ለውጥ ሊመዘገብ እንዳልቻም ገልፀዋል።

ስለዚህም በቴክኖሎጂ የመደገፍና ሳይንሳዊ በሆነ መንገድ ዘርፉን በማዘመን የተሻለ ምርት ለማስመዝገብ መንግስት ትኩረት ሰጥቶ ይሰራል ብለዋል።

የአፌዴሪ የግብርና ሚኒስትር አቶ ኡመር ሁሴን በቡኩላቸው “የግብርና ዘርፉን ከዝናብ ባለማላቀቃችን 18 ሚሊየን ዜጎች የሴፍትኔት መርሃ ግብር ጥገኛ ሆነዋል” ነው ያሉት።

እስከ ነገ በሚቆየው መድረክ ላይ 1 ሺህ 500 የፌደራል እና  የክልል አመራሮች እና የዘርፉ ባለሙያዎች በመሳተፍ ላይ ይገኛሉ።

 

በረጋሳ ፎረምሳ

You might also like
Comments
Loading...