Fana: At a Speed of Life!

ለልጁ የተላከን ደብዳቤ ያለ ፍቃድ የከፈተው አባት የ2 ዓመት እስራት ተፈርዶበታል

አዲስ አበባ፣ ግንቦት 23፣ 2011 (ኤፍ.ቢ.ሲ) ለልጁ የተላከን ደብዳቤ ያለፍቃድ በመክፈት ያነበበው አባት የሁለት ዓመት እስራት ተፈርዶበታል።

አንድ ስፔናዊ አባት ለ10 ዓመት ወንድ ልጁ የተላከን ደብዳቤ ያለ ልጁ ፈቃፈ ከፍቶ በማንበብና ይህንም በቀድሞ ባለቤቱ ጥቃት በማድረስ ለተከሰሰበት ወንጀል በመከራከሪያነት በማቅረቡ የሁለት ዓመት እስር ሊፈረድበት ችሏል።

ባሳለፍነው ረቡዕ በስፔን ሲቪያ ከተማ የሚገኘው ፍርድ ቤት ያለ ልጁ ፍቃድ፥ የተላከውን ደብዳቤ ከፍቶ በማንበቡ ምክንያት የልጁን ግላዊ መብት መጣስ በሚል የተከሰሰውን አባት ጉዳይ ተመልክቷል።

በቀድሞ ባለቤቷ ላይ ክስ የመሰረተችው እናት አባትየው የልጇን ግላዊ መረጃ ያለፍቃድ በማየቱ የሁለት ዓመት እስርና የ3 ሺህ ዩሮ ቅጣት እንዲጣልበት በጠበቃዋ በኩል ጠይቃለች።

ደብዳቤው የተላከው ከልጁ እናት አክስት ሲሆን፥ ይዘቱም አባትየው ቀደም ሲል በልጁ እናት ላይ ያደረሰውን የሰብዓዊ መብት ጥሰት የሚያስረዳ ነው ተብሏል።

ከዚህ ባለፈም የልጁ እናት አክስት በደብዳቤው ውስጥ የአባትየውን ክብር የሚነካ ስድብ መሳደቧም ተገልጿል።

የተከሳሽ ጠበቃ በበኩሉ አባትየው ለልጁ የተላከውን ደብዳቤ ሆን ብሎ እንዳልከፈተው በመግለፅ አባት ለ10 ዓመት ልጁ የተላከን መልዕክት ማየቱ የአባትነት ሃላፊነቱን ከመወጣት ጋር መታየት እንዳለበት ጠይቋል።

አቃቤ ህግ በበኩሉ ተከሳሹ የአባትነት መብቱን በዚህ መሰል ጥቃቅን ድርጊቶች ተግባራዊ ለማድረግ መሞከሩ ተገቢ አለመሆኑን በመግለፅ በፈፀመው ወንጀል መቀጣት እንዳለበት ጠይቋል።

የግራ ቀኙን ያደመጠው ችሎቱም ተከሳሹ በፈፀመው ድርጊት በሁለት ዓመት እስራት እንዲቀጣ ወስኗል።

ይሁን እንጅ የመሃል ዳኛው እስካሁን በፍርዱ ተፈፃሚነት ላይ የመጨረሻ ውሳኔ አለመስጠቱ በዘገባው ተመላክቷል።

 

ምንጭ፦ ኦዲቲ ሴንትራል

 

You might also like
Comments
Loading...