Fana: At a Speed of Life!

ሁለተኛው የሚኒስቴር መሥሪያ ቤቶችና ተጠሪ ተቋማት የመቶ ቀናት ዕቅድ አፈጻጸም ግምገማ ተካሄደ

አዲስ አበባ ፣ ግንቦት 13 ፣ 2011 (ኤፍ ቢ ሲ) ጠቅላይ ሚኒስትር ዶክተር አብይ አህመድ ሁለተኛውን የሚኒስቴር መሥሪያ ቤቶችና ተጠሪ ተቋማት የመቶ ቀናት ዕቅድ አፈጻጸምን ገምግመዋል።

የጠቅላይ ሚኒስትር ፅህፈት ቤት የፖሊሲና የአፈጻጸም ክትትል ቡድን በዛሬው ዕለት በሚኒስቴር መስሪያ ቤቶች ግምገማ አድርጓል።

ግምገማውን የተቋማቱን ሪፖርት በመመልከት፣ ከተቋማቱ ጋር ውይይት በማካሄድና ድንገተኛ ጉብኝት በማድረግ እንዲሁም ከተጠቃሚዎችና ከሌሎችም ባለድርሻ አካላት መረጃዎችን በመሰብሰብ መካሄዱን ከጠቅላይ ሚኒስትር ፅህፈት ቤት ያገኘነው መረጃ ያመላክታል።

በዚህም መሰረትም የሁለተኛው የሚኒስቴር መሥሪያ ቤቶችና ተጠሪ ተቋማት የመቶ ቀናት ዕቅድ አፈጻጸም ከመጀመሪያው  የተሻለ መሆኑ ነው የተገለፀው።

የህግ ክፍተቶችን ከመሙላት አንፃር የሚኒስቴር መሥሪያ ቤቶችና ተጠሪ ተቋማት የተለያዩ ረቂቅ አዋጆችን በማዘጋጀት ወደ ስራ እንዲገባ ለሚመለከተው አካል ማቅረባቸው በጥንካሬነት ተነስቷል።

በተጨማሪም በስራ ሂደት ውስጥ ስራን በተገቢ ሁኔታ ለማከናወን የማያስችሉ መመሪያዎችንና ህጎችን ለማሻሻል በርከታ ስራዎች መከናወናቸው ነው የተገለፀው።

በሌላ በኩል የውጭ ጉዳይ ሚኒስቴር በተለያዩ ችግሮች በውጭ ሀገራት ማረሚያ ቤቶች ውስጥ የነበሩ በርካታ ዜጎችን በሰላም ወደ ሀገራቸው እንዲመለሱ ማድረጉ በጠንካራ ጎን ተነስቷል።

በአንፃሩ በሀገሪቱ የሚስተዋለውን የገቢ ጉድለት ለማስተካከል የገንዘብ ሚኒስቴር ከሚመለከታቸው አካላት ጋር በቅንጅት ሊሰራ እንደሚገባ ተመላክቷል።

በተመሳሳይ የንግድ ሚኒስቴር ሀገሪቱ የምታካሂደውን የወጪ ንግድ ልውውጥ ለማሳደግ መስራት እንደሚገባው ተጠቁሟል።

በቀጣይም የሚኒስቴር መሥሪያ ቤቶችና ተጠሪ ተቋማት የመንግስትን የትኩረት አቅጣጫ ተከትለው እቅድ በማዘጋጀት ተፈፃሚ ለማድረግ መስራት እንደሚገባቸው ተነስቷል።

የመጀመሪያው የሚኒስቴር መሥሪያ ቤቶችና ተጠሪ ተቋማት የመቶ ቀናት ዕቅድ አፈጻጸም ግምገማ ከሶስት ወራት በፊት መካሄዱ የሚታወስ ነው።

You might also like
Comments
Loading...