Fana: At a Speed of Life!

ሀሰተኛ የትምርህት ማስረጃዎችን ለመከላከል ዘመናዊ ስርዓት መዘርጋት ይገባል ተባለ

አዲስ አበባ፣ ግንቦት 7፣ 2011 (ኤፍ.ቢ.ሲ) ሐሰተኛ የትምህርት ማስረጃዎችን ለመቆጣጠርና የሚያስከትሉትን ጉዳት ለመቀነስ ጠንካራ እና ዘመናዊ ስርዓት መዘርጋት እንደሚገባ የደቡብ ክልል ፐብሊክ ሰርቪስና የሰው ሃብት ልማት ቢሮ አስታወቀ።

ቢሮው ሀሰተኛ የትምህርት ማስረጃዎች እያስከተሉት ከሚገኘው ሀገራዊ ጉዳት አንጻር መንግስት ልዩ ትኩረት ሊሰጠው እንደሚገባ ለፋና ብሮድካስቲንግ ኮርፖሬት ገልጿል፡፡

እስከ አሁን ድረስ ለዘርፉ ችግር ትኩረት ሰጥቶ እንዳልሰራ የሚነገረው  የከፍተኛ ትምህርት ጥራትና አግባብነት ኤጀንሲ፥ በመጪው ሰኔ የሚጠናቀቅ ዘመናዊ እና በቴክኖሎጅ ስርዓት የተደገፈ የመረጃ አያያዝ ስርዓትን ስራ ላይ አውላለሁ ብሏል፡፡

በክልሉ ከ2005 ጀምሮ እስከ 2010 ዓ.ም በመንግስት ተቋማት ተቀጥረው በሚሰሩ ግለሰቦች የትምህርት ማስረጃ ላይ በተደረገ ማጣራት፥ ከ3ሺህ 200 በላይ ሀሰተኛ የትምህርት ማስረጃዎች ተገኝተዋል፡፡

በክልሉ  በተደረገ ሀሰተኛ የትምህርት ማሰረጃዎችን  የማጣራት ስራም የሲዳማ ዞን ከፍተኛ ቁጥር ያላቸው ማስረጃዎች የተገኙበት አካባቢ ነው ተብሏል፡፡

ሀሰተኛ የትምህርት ማሰረጃዎችን  ተጠቅመው ሲሰሩ የቆዩ የመንግስት ሰራተኞችን በህግ አግባብ የማስጠየቅ ስራ እንደተከናወነም የክልሉ ፐብሊክ ሰርቪስና የሰው ሃብት ልማት ቢሮ ምክትል ሃላፊ አቶ መኮንን መንግስቱ ገልጸዋል።

በሀገር አቀፍ ደረጃ እውቅና ከተሰጣቸው የትምህርት ተቋማት የሚሰጡ የትምህርት ማስረጃዎችን ለመለየት የሚያስቸል ጠንካራ ስርዓት አለመዘርጋቱ ከዘርፉ ጋር በተያያዘ ለሚነሱ ችግሮች አፋጣኝ መፍትሄ  ለመስጠት አዳጋች እንደሆነ ይነገራል፡፡

አቶ መኮንን ችግሩ አሳሳቢ እና በሀገር ላይ የሚያስከትለው ከፍተኛ ኪሳራ ሊጤን እንደሚገባና በዞኑ በባለፉት ሦስት ዓመታት በትምህርት ዘርፍ ያጋጠመውን ክስተት አንስተዋል፡፡

መሰል ችግሮችን ለመፍታት ከበርካታ ባለድርሻ አካላት የሚጠበቅ ሃላፊነት ይኑር እንጅ ጉዳዩ በዋናነት የሚመለከተው የከፍተኛ ትምህርት ጥራትና አግባብነት ኤጀንሲ እስከ አሁን ለችግሩ አሳሳቢነት በቂ ትኩረት እንዳልሰጠ ማንሳት ይቻላል፡፡

ቢዘገይም አሁን ላይ ኤጀንሲው መሰል ችግሮችን ለመፍታት የሚያስችል ዘመናዊ ስርዓት እየዘረጋ እንደሚገኝ ተገልጿል፡፡

የኤጀንሲው ዋና ዳይሬክተር ዶክተር አንዷለም አድማሴ መረጃዎችን በመረጃ ቋት ወይም ዳታቤዝ አማካይነት የማስቀመጥ እና በቴክኖሎጅ የተደገፈ የመረጃ አያያዝ ስርዓት ከሀሰተኛ የትምህርት ማስረጃዎች ጋር  የተያያዙ ችግሮችን ለመቀነስ እንደሚያስችል ገልጸዋል፡፡

ዘመናዊ የመረጃ ስርዓቱ የግል ከፍተኛ የትምህርት ተቋማትን ያማከለ እንደሆነም ዶክተር አንዷለም ጠቅሰዋል፡፡

ሐሰተኛ የትምህርት ማስረጃዎችን ሳያጣሩ ከተማሪዎች በመቀበል ምዝገባ የሚያካሂዱ የግል ከፍተኛ የትምህርት ተቋማት ከማስረጃዎች ጋር በተያያዘ ለሚነሱ ችግሮች እንደ ምክንያት ሲሆኑም ይስተዋላል፡፡

ኤጀንሲው ተያያዥ ችግሮችን በተመሳሳይ ለመፍታት ጠንካራ እና የተቀናጀ አሰራሮችን መዘርጋት ይገባዋል ተብሏል፡፡

 

በአወል አበራ

 

 

You might also like
Comments
Loading...