Fana: At a Speed of Life!

ፓርቲዎች አቋማቸውን የሚያሰርጹበት ሂደት የሀገርን ደህንነት በማይጎዳ መልኩ መሆን ይገባዋል ተባለ

አዲስ አበባ፣ ሚያዚያ 11፣ 2011 (ኤፍ.ቢ.ሲ) ፓርቲዎች የፖለቲካ አቋም እና አስተሳሰባቸውን የሚያሰርጹበት ሂደት የሀገርን ደህንነት እና ህልውና በማይጎዳ መልኩ መሆን እንደሚገባው የፖለቲካ ፓርቲ አመራሮች ገለፁ።

ፋና ብሮድካስቲንግ ኮርፖሬት ያነጋገራቸው የፖለቲካ ፓርቲ አመራሮች አንድ ማድረግ በሚችሉ ጉዳዮች ላይ ተቀራርቦ ከመስራት ይልቅ ልዩነትን ወደ ሚያሰፉ ጉዳዮች ማተኮር የትኛውንም አካል ወደፊት አያራምድም ብለዋል።

አሁን ላይ የፖለቲካ ፓርቲዎች በአሃዝ ከፍ ይበሉ እንጂ ፓርቲያቸውን ያዋቀሩበት መንገድ ግን ብሄርን ወይም ዜግነትን መሰረት ያደረገ ነው።

በአወቃቀራቸው ምክንያትም በተለይ ከቅርብ ጊዜ ወዲህ በመካከላቸው ያለው ክፍተት እጅጉን እየሰፋ እንደመጣ ነው የሚነገረው፡፡

ይህንን መሰረት በማድረግም በመሃል የተፈጠረው ክፍተት የሀገርን ህልውና ስጋት ላይ የሚጥል ከሚሆንበት ደረጃ ላይ እንዳይደርስ የፓርቲዎቹ ሃላፊነት ምን መሆን አለበት በሚለው ላይ ፋና ብሮድካስቲንግ ኮርፖሬት የፓርቲ ሃላፊዎችን አነጋግሯል፡፡

የአገው ዴሞክራሲያዊ ፓርቲ ሊቀመንበር አቶ አንዱአለም ጥላሁን ጫፍ እና ጫፍ የረገጠው የሁለቱ ወገኖች አቋም የትም አያደርስም ይላሉ፡

አቶ አንዱአለም በመከባበር እና በሃሳብ የበላይነት ላይ የተመሰረተ አካሄድ አማራጭ የሌለው መሆኑንም ገልፀዋል፡፡

በቅርቡ ወደ ሀገር የገባው የኢትዮጵያችን ህዝባዊ ፓለቲካ ንቅናቄ ድርጅት ሊቀመንበር አቶ አክሊሉ አጥናፉ በበኩላቸው ፓርቲዎች ከፋፋይ ሀሳቦችን በማራመድ ተከታዮቻቸውን ወዳልተገባ መንገድ ሲያስገቧቸው ይስተዋላል ነው የሚሉት፡፡

በመሆኑም ወደ ሚፈለገው የመከባበር ፖለቲካ ለመግባት የፓርቲዎች ሃላፊነት ከፍተኛ መሆኑን ገልፀዋል።

የአማራ ብሄራዊ ንቅናቄ  ህዝብ ግንኙነት ሀላፊ አቶ ክርስቲያን ታደለ የሀገሪቱ ፓለቲካ በጠልነት ትርክት ላይ እንደተመሰረተ ተናግረዋል፡፡

በፖለቲካው ከመቀራረብ ይልቅ በሚገባ ሳይተዋወቁ በሩቁ የመፈራረጅ እና ስም የመጠፋፋት ልምድ በመኖሩ ለፖለቲካውም ሆነ ለሃገሪቱ የማይጠቅሙ ክፍተቶች እንዲስተዋልበት አድርጓል ነው ያሉት።

ይህም ብዙ ርቀት የማያስኬድ በመሆኑ ቢቻል አንድ በሚያደርጉ ጉዳዮች ላይ ተቀራርቦ መስራት ካልሆነም ልዩነቶችን በማያሰፋ እና ምክንያታዊነትን መሰረት ያደረጉ ትችቶችን ማዳበር እንደሚገባ ጠቁመዋል፡፡

የቀድሞው የሰማያዊ ፓርቲ ሊቀመንበር አቶ የሽዋስ አሰፋ በበኩላቸው በእንዲህ አይነት የሽግግር ወቅት ላይ የፖለቲካ ፓርቲዎች ከህዝብና ከመንግስት ጋር በተለይ ደግሞ እርስ በእርሳቸው ያላቸው መስተጋብር ወሳኝ እንደሆነ አንስተዋል።

ፓርቲዎቹ በዚህ ረገድ ተቀራርቦ በመስራት ለሀገር ህልውና የሚኖረውን አስተዋጽኦ በተግባር ለተከታዮቻቸው በማሳየት አርዓያ መሆን ይኖርባቸዋልም ብለዋል።

በትእግስት አብርሃም

 

You might also like
Comments
Loading...