Fana: At a Speed of Life!

ጠ/ሚ ዶክተር አብይ አህመድ ሱዳናውያን ልዩነቶቻቸውን በንግግር እንዲፈቱ ጥሪ አቀረቡ

አዲስ አበባ ፣ ሚያዚያ 7 ፣ 2011 (ኤፍ ቢ ሲ) ሱዳናውያን ልዩነቶቻቸውን በንግግር እንዲፈቱ የኢፌዴሪ ጠቅላይ ሚኒስትር ዶክተር አብይ አህመድ ጥሪ አቀረቡ።

ጠቅላይ ሚኒስትሩ በሱዳን የተደረገውን የመንግስት ለውጥ አስመልክቶ መልዕክታቸውን አስተላልፈዋል።

መላው ሱዳናውያን ያላቸውን ልዩነት በንግግር በመፍታት የጋራ መግባባት ላይ ሊደርሱ እንደሚገባ ጥሪያቸውን አቅርበዋል።

ከዚህ ባለፈም ሁሉን አቀፍና ባለ ድርሻ አካላትን ያሳተፈ ውይይት ማድረግ ይገባልም ነው ያሉት፤ ይህም ዴሞክራሲያዊ፣ ጠንካራና የተዋሃደች ሱዳንን ለመፍጠር የሚደረገውን ጥረት እንደሚያግዝ በመጥቀስ።

በሚደረጉ ውይይቶች ልዩነቶች ይጠባሉ ያሉት ጠቅላይ ሚኒስትሩ፥ ልዩነቶች በሃሳብ እንጅ በአስተዳደር ደረጃ ሊኖሩ እንደማይገባም አስገንዝበዋል።

ጠቅላይ ሚኒስትሩ በመልዕክታቸው መላው ሱዳናውያን ድምጻቸውን በሰላማዊ መንገድ በማሰማት በለውጡ ሂደት በሃላፊነት ለተንቀሳቀሱበት መንገድ ያላቸውን አድናቆት ገልጸዋል።

ሂደቱ ጠንካራዋንና ዴሞክራሲያዊቷን ሱዳንን ለመገንባት እንደሚያግዝም በንግግራቸው ጠቅሰዋል።

በተጨማሪም ወታደራዊ የሽግግር ምክር ቤቱ የህዝቡን ፍላጎት ተረድቶ ለውጡን ያካሄደበትን መንገድም አድንቀዋል።

ወቅቱም መላው ሱዳናውያን ለሃገራቸው አንድነት ያለምንም ልዩነት የሚሰሩበት እንደሆነ መግለጻቸውን ከጠቅላይ ሚኒስትር ፅህፈት ቤት ያገኘነው መረጃ ያመላክታል።

You might also like
Comments
Loading...