Fana: At a Speed of Life!

ኢትዮጵያና የቻይናው ኤስ ጂ ሲ ሲ ኩባንያ የ1 ነጥብ 8 ቢሊየን ዶላር ኢንቨስትመንት ስምምነት ተፈራረሙ

አዲስ አበባ፣ ሚያዚያ 16፣ 2011 (ኤፍ.ቢ.ሲ)ኢትዮጵያና የቻይናው ኤስ ጂ ሲ ሲ ኩባንያ የ1 ነጥብ 8 ቢሊየን ዶላር ኢንቨስትመንት ስምምነት ተፈራረሙ::

ጠቅላይ ሚኒስትር ዶክተር አብይ አህመድ ከቻይናው ኤስ ጂ ሲ ሲ ኩባንያ ሀላፊዎች ጨምሮ ከተለያዩ ኩባንያዎች የስራ ሃላፊዎች ጋር ተወያይተዋል።

ውይይቱን ተከትሎም ለኃይል ማሠራጫና ማከፋፈያ መሥመር ዝርጋታ የ1 ነጥብ 8 ቢሊየን ዶላር ኢንቨስትመንት እንደተፈረመ ተነግሯል።

ይህ ፕሮጀክት ለ16 የኢንዱስትሪ ፓርኮች ኃይል አቅርቦት፣ ለሁለተኛው የአዲስ አበባ ጅቡቲ የባቡር መሥመርና ለተለያዩ የሀገሪቱ ከተሞች የኤሌክትሪክ ኃይል ለማዳረስ የሚያስችል ነው።

ይኸውም ያልተቋረጠ የኤሌክትሪክ ኃይል ከማቅረብ በተጨማሪ የሥራ እድል ለመፍጠርም እንደሚረዳ ከጠቅላይ ሚኒስትር ፅህፈት ቤት ያገኘነው መረጃ ያመለክታል።

ጠቅላይ ሚኒስትሩ በተለይ ከቻይና ሬልዌይ ኮርፖሬሽን (ሲአርሲሲ )ሃላፊዎች  ጋር ባደረጉት ምክክር ከቀናት በኋላ በሚካሄደው የቤልት ኤንድ ሮድ ጉባኤና ተያይዘው በሚነሱ ፕሮጀክቶች ዙሪያ መክረዋል።

ኩባንያው ከሚያከናውናቸው ግዙፍ የመሰረተ ልማት ግንባታዎች መካከል የቤልት ኤንድ ሮድ ማእቀፍ አካል የሆነው የኢትዩ ጅቡቲ ባቡር መስመር ግንባታ ፕሮጀክት አንዱ ነው።

ኩባንያው በተጨማሪም በአግሮ ኢንዱስትሪ ፓርኮች ግንባታና በማእድን ዘርፍ በተለይም የነዳጅና ተፈጥሮ ጋዝ ማምውጣት ስራ ላይ የመሳተፍ ፍላጎት እንዳለው ይፋ ተደርጓል።

የሲ አር ሲ ሲ ኩባንያ በሸገርን ማስዋብ ፕሮጀክት ላይ ለመሳተፍ እንደሚፈልግም አስታውቃል።

ከመሰረተ ልማት ግንባታ አንስቶ እስከ አምራች ዘርፍ ድረስ በተለያዩ ዘርፎች ላይ መሰማራት እንደሚፈልጉ የየኩባንዎቹ ሃላፊዎች ተናግረዋል።

በተጨማሪም ጠቅላይ ሚኒስትሩ ሲኖሹር ከተባለው የቻይና የውጪ ንግድና የብድር ኢንሹራንስ ኩባንያ ኃላፊዎች ጋር ተወያይተዋል፡፡

ኃላፊዎቹም በተለይም የቻይና መንግስት ግሪድ ኩባንያ ለኃይል ማመንጫ ለገባው የኢንቨስትመንት ስምምነት ትግበራ ሙሉ ትብብር እንደሚያደርጉ ገልጸዋል።

የኢፌዴሪ ጠቅላይ ሚኒስትር ዶክተር አብይ አህመድ በቤልት ኤንድ ሮድ ኢኒሼቲቭ ለመሳተፍ ወደ ቻይና ማቅናታቸው የሚታወስ ነው፡፡

የቤልት ኤንድ ሮድ ኢኒሼቲቭ በፈረንጆቹ 2013 በቻይናው ፕሬዚዳንት ሺ ጂንፒንግ አማካኝነት መተግበር የጀመረ ሲሆን፥ በ2017 የመጀመሪያ ፎረሙን አካሂዷል።

ኢኒሼቲቩ አፍሪካን ጨምሮ፣ ደቡብ ምስራቅ እስያን እና የአውሮፓ ሃገራትን ያካተተና ሃገራትን በመንገድና በመሰረተ ልማት የማስተሳሰር አላማን ያነገበ መሆኑ ይነገራል።

ከ65 በላይ ሃገራትን ያቀፈው ይህ ኢኒሼቲቭ ለቀጠናዊ ትስስር ቅድሚያ በመስጠት የሚሰራም ነው።
የፖሊሲ፣ መሰረተ ልማት፣ ንግድ ፋይናንስ እና የህዝብ ለህዝብ ትብብርን መሰረት ያደረገ የትብብር ማዕቀፍም ነው።

በዘንደሮው ፎረም ላይ ከ1 ሺህ በላይ ተሳታፊዎች ይገኛሉ ተብሎ የሚጠበቅ ሲሆን፥ ከዋናው ፎረም በተጓዳኝ የሁለትዮሽ ውይይቶች እንደሚኖሩ ይጠበቃል።

ከዚህ ባለፈም በተለያዩ መስኮች የትብብር ስምምነቶች ይፈረማሉ ተብሎም ነው የሚጠበቀው።

You might also like
Comments
Loading...