Fana: At a Speed of Life!

ድጋፍ የሚያስፈልጋቸውን የህብረተሰብ ክፍሎች ተጠቃሚ የሚያደርግ ስምምነት ተፈረመ

አዲስ አበባ፣ ሚያዚያ 11፣ 2011 (ኤፍ.ቢ.ሲ) ድጋፍ የሚያስፈልጋቸውን የህብረተሰብ ክፍሎች ተጠቃሚ የሚያደርጉና በመንግስት ተቋማት የሚተገበሩ የትብብር ሥራዎች ላይ የሠራተኛና ማህበራዊ ጉዳይ ሚኒስቴር የመግባቢያ ሰነድ ተፈራረመ፡፡

ስምምነቱ አረጋውያንን፣ አካል ጉዳተኞችንና ለማህበራዊ እና ኢኮኖሚያዊ ችግሮች ተጋላጭ የሆኑ የህብረተሰብ ክፍሎችን ተጠቃሚነትና ተሳታፊነት ለማረጋገጥ የሚያስችል ነው ተብሏል፡፡

እነዚህ የህብረተሰብ ክፍሎችን በተመለከተ አስፈፃሚ አካላት የሚያከናውኗቸው ተግባራት፣ መሰረታዊ አገልግሎቶችን እንዲያገኙ የሚያስችሉ ስራዎችን በትብብር ለማከናወን እና በሥራ ዕድል ማስፋፊያ ዙሪያ የሚሰሩ ሴክተር መስሪያ ቤቶች የሚያከናውኗቸው እና በትብብር የሚሰሩ ስራዎችን የተመለከቱ ናቸው፡፡

የሠራተኛኛ ማህበራዊ ጉዳይ ሚኒስትር ዶክተር ኤርጎጌ ተስፋዬ ማህበራዊ ችግሮቻችንን በጊዜ የመከላከል፣ የመመከትና በዘላቂነት እልባት እያበጁ የመሄድ ሥርዓት ሳይዘረጋና ሀገራዊ አቅም ሳይፈጠር መቅረቱን አንስተዋል።

ከዚህ አንጻርም በልማት ውስጥ የመሳተፍና የልማት አቅም የመሆን ብቃት ያልጎደላቸው አረጋውያንና አካል ጉዳተኞች ዕድል የሚነፈጉበት ችግር አልተወገደም ብለዋል፡፡

በመሆኑም በተለያዩ ማህበራዊ ችግር ለተጎዱና ለአደጋ ተጋላጭ ለሆኑ የህብረተሰብ ክፍሎች ፈጥኖ የመድረስ ትጋትን በመጨመርና በመደበኛ አሰራር በማካተት ተጠቃሚነታቸውን ማረጋገጥ እንደሚገባ ተናግረዋል፡፡

በሠራተኛና ማህበራዊ ጉዳይ ሚኒስቴር የማህበራዊ ዘርፍ ሚኒስትር ዲኤታ አቶ
ጌታሁን አብዲሳ የመግባቢያ ሰነድ ከተፈራረሙ ተቋማት ጋር በጋራ በመሆን እቅድ በማዘጋጀት ወደ ስራ እንደሚገባ መናገራቸውን ከሰራተኛና ማህበራዊ ጉዳይ ሚኒስቴር ያገኘነው መረጃ ያመላክታል፡፡

You might also like
Comments
Loading...