Fana: At a Speed of Life!

የግብፅ ፓርላማ በሀገሪቱ ህገ መንግስት ማሻሻያ ላይ የፊታችን ሐሙስ ድምፅ ይሰጣል

አዲስ አበባ፣መጋቢት 7፣2011 (ኤፍ.ቢ.ሲ) የግብፅ ፓርላማ አባላት የሀገሪቱን ህገ-መንግስት ለማሻሻል የቀረበውን ረቂቅ ሀሳብ ለማፅደቅ የፊታችን ሀሙስ ድምፅ ይሰጣሉ።

የግብፅን ህገ-መንግስት ለማሻሻል ከቀረቡት ረቂቅ ሰነዶች ውስጥም የፕሬዚዳንት ኤል ሲሲን የስልጣን ዘመን ለማራዘም የቀረበው ሀሳብ መካተቱ ተገልጿል።

ከዚህ ባለፈም ረቂቁ 180 አባላት ያሉትና ሴኔት ተብሎ የሚጠራ ሁለተኛ የፓርላማ ክፍል ማቋቋም ይገባል የሚል ሀሳብ አካቷል ነው የተባለው ።

በተጨማሪም ህገ-መንግስቱን ለማሻሻል የቀረበው ረቂቅ የሀገሪቱ ፕሬዚዳንት ዳኞችንና አቃቤ ህጎችን ለመሾም የሚያስችል አዲስ ስልጣን ይሰጣል ተብሏል።

በሌላ በኩል በህገ-መንግስቱ አንቀፅ 200 ላይ የተገለፀውና  የሀገሪቱ ወታደሮች ህገ መንግስቱን ለማስከበር እንዲሁም የዜጎችን ዴማክራሲያዊ መብት ከማስጠበቅ አንፃር ያላቸውን ሃላፊነት በሚያብራራው አንቀፅ ላይ ማሻሻያ የሚደረግ መሆኑ ተገልጿል።

ስለሆነም እነዚህና መሰል የማሻሻያ ሀሳቦች በሀገሪቱ ፓርላማ የህግ አውጭ አካላት ፀድቀው የፊታችን ሀሙስ ፓርላማው ድምፅ የሚሰጥባቸው መሆኑን የፕሬዚዳንቱ ቃል አቀባይ አሊ አብደላ ተናግረዋል ።

ፓርላማው ማሻሻያውን  የሚያፀድቀው ከሆነም በያዝነው ወር ላይ የሀገሪቱ ህዝብ በጉዳዩ ላይ ሀሳቡን እንዲሰጥ ሪፈረንደም ይካሄዳል ነው ያሉት ።

የቀረበውን የህገ መንግስት ማሻሻያ ተከትሎም የፕሬዚዳንት ኤል ሲሲ ደጋፊዎች ፕሬዚዳንቱ የጀመሯቸውን የተለያዩ  የልማት ተግባራት ለማጠናቀቅ ያስችለዋል በማለት ላይ ይገኛሉ።

 

ምንጭ ፦ሬውተርስ

You might also like
Comments
Loading...