Fana: At a Speed of Life!

የዓለም አገር አቋራጭ ውድድርን 1ኛ በመሆን ላጠናቀቀው የኢትዮጵያ አትሌቲክስ ልኡክ አቀባበልና የሽልማት ስነ ስርዓት ተካሄደ

 

አዲስ አበባ፣ መጋቢት 24፣ 2011 (ኤፍ.ቢ.ሲ) በዴንማርክ አርሁስ ከተማ በተካሄደው 43ኛ ጊዜ የዓለም አገር አቋራጭ ውድድርን 1ኛ በመውጣት ላጠናቀቀው የኢትዮጵያ አትሌቲክስ ልኡክ አቀባበልና የሽልማት ስነ ስርዓት ተካሄደ።

የኢትዮጵያ አትሌቲክስ ልኡክ ውድድሩን በ5 ወርቅ፣ በ3 ብር እና በ3 ነሃስ በድምሩ በ11 ሜዳልያዎችበመሰብሰብ ከዓለም 1ኛ ደረጃ ይዞ ማጠናቀቁ ይታወሳል።

በውድድሩ ላይ በመሳተፍ በአንደኝነት ላጠናቀቀው የአትሌቲክሰ ልኡካን ቡድን በዛሬ እለት በአራራት ሆቴል ደማቅ የአቀባበልና የሽልማት መርሃ ግብር መደረጉን የኢትዮጵያ አትሌቲክ ፌዴሬሽን አስታውቋል።

የባህልና ቱሪዝምሚኒስትር ዶክተር ሂሩት ካሳው ባደረጉት ንግግር፥ ሁሉም ባለድርሻ አካላት መስራት የሚገባቸውን በመስራታቸው የቀደምቱ የአረንጓዴ ጎርፍ ውጤት መመለስን ማሳያ የሆነና በመደመር መንፈስ በጋራ የመጣ ድል በመሆኑ እንኳን ደስ አላችሁ ብለዋል።

በቀጣይ በሚደረጉ አህጉራዊና አለም አቀፍ ውድድሮች ሚኒስትር መስሪያ ቤቱ አስፈላጊውን ድጋፍ በማድረግ ከፌዴሬሽኑ ጎን ቆሞ እንደሚሰራ ገልፀዋል።

የስፖርት ኮሚሽን ኮሚሽነር አቶ ርስቱ ይርዳውም፥ የተገኘው ውጤት እንደ ሃገር የኮራንበትና ለቀጣይ ውድድሮች የበለጠ እንድንዘጋጅ የሚደርገን ሲሆን፥ ኮሚሽኑም ባስፈላጊው መንገድ ሁሉ ፌዴሬሽኑን ለመደገፍ ዝግጁ መሆኑን ገልፀዋል።

የኢትዮጵያ አትሌቲክስ ፌዴሬሽን ምክትል ፕሬዝዳት አትሌት ገብረእግዚአብሄር ገብረማርያም በበኩሉ፥ የተመዘገበው ውጤት የሚያኩራራን ሳይሆን ለበለጠ ውጤት ወገባችንን ጠበቅ አድርገን እንድንሰራ ኃላፊነት የሰጠን ውጤት ነው ብሏል።

በመጨረሻም ለልኡካን ቡድኑ እንዳስመዘገቡት ውጤትና የስራ ሃላፊነት የባህልና ቱሪዝም ሚኒስቴር እና ስፖርት ኮሚሽን በጋራ፤ እንዲሁም የኢትዮጵያ ኦሎምፒክ ኮሚቴና የኢትዮጵያ አትሌቲክስ ፌዴሬሽንም የገንዘብ ሽልማት አበርክተዋል፡፡

የኢትዮጵያ አትሌቲክሰ ፌዴሬሽን ወርቅ ላስመዘገቡ 30 ሺህ ብር፣ ብር ላስመዘገቡ 20 ሺህ ብር፣ ነሃስ ላስመዘገቡ 10 ሺህ ብር፣ ዲፕሎማ ላገኙ 6 ሺህ ብር እና ለተሳታፊዎች የ3 ሺህ ብር ለልኡካን ቡድኑም እንዳስመዘገቡት ውጤት ኃላፊነት የገንዘብ ሽልማት አበርክቷል።

You might also like
Comments
Loading...