Fana: At a Speed of Life!

የእምቦጭ አረምን ጨምሮ ከቆሻሻ ነዳጅ ለማምረት የሚያስችል ዝግጅት እየተደረገ መሆኑ ተገለፀ

አዲስ አበባ፣ ሚያዚያ 11፣ 2011 (ኤፍ.ቢ.ሲ) የእምቦጭ አረምን ጨምሮ ከቆሻሻ ነዳጅ ማምረት የሚያስችል ዝግጅት እየተደረገ መሆኑን የኢኖቬሽንና ቴክኖሎጂ ሚኒስቴር አስታወቀ፡፡

ሚኒስቴሩ የአቶ አበሻ ዳርጌ የፈጠራ ስራ የሆነውን ከቆሻሻ ነዳጅ የማምረት ፕሮጀክትን ወደ ስራ ለማስገባት እየሰራ መሆኑን አስታውቋል።

የፈጠራ ስራው እምቦጭና የፕላስቲክ ቆሻሻን ጨምሮ ከማንኛውም ቆሻሻ ውጋጅ ነጭ ጋዝ፣ ቤንዚን፣ ናፍታ፣ የአውሮፕላን ነዳጅና ሚቴን ማምረት የሚያስችል ነው ተብሏል፡፡

በዚህ ሂደት ውስጥ ከሚገኘው ተረፈ ምርት ደግሞ የአፈር ማዳበሪያ፣ ማለስለሻ ግሪስ፣ ሻማ፣ የጫማ ቀለምና ሌሎችንም መስራት ያስችላል ነው የተባለው።

የነዳጅ ምርቱን በፍጥነት ለመጀመር ለነዳጅ ማምረት ሂደት የሚጠቅም ያልተወሳሰበ ማሽን ለመስራት የሚችል የባለሙያዎች ቡድን ተቋቁሞ ወደ ስራ ገብቷል፡፡

ከኬሚካልና መካኒካል ኢንጂነሪንግ እና ከሚመለከታቸው ባለድርሻ አካላት የተውጣጠው ይህ ቡድን ለነዳጅ ማምረቻ የሚያገለግል የማሽን ዲዛይን ሰርቶ ካቀረበ በኋላ፥ ወደ ማሽን ምርት ተገብቶ በየከተሞቹ ነዳጅ ማምረት የሚያስችል
አቅም ለመፍጠር ይሰራል፡፡

ምርቱ ጥራት እንዲኖረው ለማድረግም በዘርፉ የተሻለ እውቀት ያላቸውን ሰዎች በማሳተፍ የሚሰራ መሆኑን ከሚኒስቴሩ ያገኘነው መረጃ ያመላክታል።፡

የኢኖቬሽንና ቴክኖሎጅ ሚኒስትር ዲኤታ አቶ ጀማል በከር ኢትዮጵያ ለነዳጅ የምታወጣውን ወጪ ለማስቀረትና ለመንግስት ፈተና የሆነውን የውጭ ምንዛሪ እጥረት ለመቅረፍ በፍጥነት ወደ ስራ ለመግባት እንደሚሰራ ተናግረዋል፡፡

አቶ አበሻ ዳርጌ በበኩላቸው ይህንን ምርምር ከ10 አመት በፊት ጀምሮ ሲሰሩ እንደቆዩና በተለያዩ የመንግስት አካላት ጫና ወደ ስራ መግባት እንዳልቻሉ ገልጸዋል።

የፈጠራ ባለሙያው የካርበን ልቀትን እስከ 95 በመቶ መቀነስ የሚያስችል ቴክኖሎጂም እንዳላቸው ነው የተናገሩት።

የእንቦጭ አረምን ወደ ነዳጅነት መቀየር ካልሆነም ብዝሃ ህይወቱ ሳይጎዳ እዚያው ባለበት ማጥፋ የሚያስችል የፈጠራ ስራም አለኝ ብለዋል።

You might also like
Comments
Loading...