Fana: At a Speed of Life!

የኢትዮጵያ ኦሊምፒክ ኮሚቴ በኦሊምፒክ ሳምንት ዙሪያ ተወያየ

አዲስ አበባ ፣ ሚያዚያ 16 ፣ 2011 (ኤፍ ቢ ሲ) የኢትዮጵያ ኦሊምፒክ ኮሚቴ ከሰኔ 16 እስከ 23 ቀን 2011 ዓ.ም በሚከበረው አለም አቀፍ የኦሊምፒክ ሳምንት ዙሪያ በቢሾፍቱ ከተማ ውይይት አደረገ።

በውይይት መድረኩ ላይ የባህልና ቱሪዝም ሚኒስትር፣ የስፖርት ኮሚሽን፣ የክልልና የከተማ አስተዳደር የስፖርት ቢሮ ሃላፊዎች ተገኝተዋል።

በመድረኩ የኦሊምፒክ ሳምንት አከባበር ላይ በሚከናወኑ ተግባራትና በአስፈጻሚ አካላት ዙሪያ በቀረበው እቅድ ላይ ውይይት ተደርጎበታል።

የኢትዮጵያ ኦሊምፒክ ኮሚቴ ፕሬዚዳንት ዶክተር አሸብር ወልደጊዮርጊስ ኢትዮጵያ በኦሊምፒክ ውድድሮች ላይ ስኬታማ ብትሆንም ተተኪ ስፖርተኞችን በሁሉም ዘርፍ ማፍራት አለመቻሉን አንስተዋል።

በስፖርቱ አካባቢ ያሉ የአስፈጻሚ አካላት ድክመት፣ የግንዛቤ ማነስ፣ የገንዘብ ችግርና የተቀናጀ አሰራር አለመኖር  ለሚስተዋለው ውጤት ማጣት ችግር ምክንያት መሆናቸው ተነስቷል።

የባህልና ቱሪዝም ሚኒስትር ዶክተር ሂሩት ካሳሁን በበኩላቸው፥ የኦሎምፒክ ስፖርት የሃገሪቱን ስም ከፍ ከሚያደርጉ መድረኮች አንዱ መሆኑን ተናግረዋል።

ይሁን እንጅ ኢትዮጵያ ካላት ታሪክና ጥሩ ውጤት አንጻር በሩጫ ውድድር ላይ ብቻ መገደቧ አሳሳቢ መሆኑን ጠቅሰው፥ ከዚህ አንጻርም በሌሎች የስፖርት አይነቶች ተፎካካሪነትን ማሳደግ ይገባል ብለዋል።

ከሰኔ 16 እስከ 23 ቀን 2011 ዓ.ም የሚቆየው የኦሎምፒክ ሳምንት በሀገር አቀፍ ደረጃ በሁሉም ክልሎችና የከተማ አስተዳደሮች በተለያዩ ስፖርታዊ ውድድሮች፣ በኦሎምፒክ ላይ በሚደረጉ የግንዛቤ ማስጨበጫ ውይይቶች በሙዚቃ ድግስና በየክልሉ በሚደረጉ የገቢ ማሰባሰቢያ ፕሮግራሞች ይከበራል ተብሏል።

የኦሊምፒክ ሳምንቱ ሲከበር ሰላምና ሀገራዊ ስሜትን እንዲያመጣና ተተኪ ስፖርተኞችን ለማፍራት እንዲሁም በጃፓን 2020 በቶኪዮ ለሚዘጋጀው የኦሊምፒክ ውድድር ከወዲሁ ስሜቱን ለማምጣት ታሳቢ ያደረገ መሆኑም በመድረኩ ተገልጿል።

 

በአፈወርቅ አበበ

 

You might also like
Comments
Loading...