Fana: At a Speed of Life!

የአካል ጉዳተኛ ጓደኛውን ተሸክሞ ትምህርት ቤት የሚያደረሰው ተማሪ

አዲስ አበባ፣ መጋቢት 23፣ 2011 (ኤፍ.ቢ.ሲ) ግለኝነት በገነነበትና ዕርዳታ የሚያስፈልጋቸው ሰዎችን ችላ እያለ በሚያልፍ ዓለም ውስጥ የሁለት ታዳጊዎች አስገራሚ ታሪክ በዚህ ሳምንት አነጋጋሪ ሆኗል።

ነገሩ እንዲህ ነው በደቡባዊ ቻይና አንድ ተማሪ የአካል ጉዳተኛ ጓደኛውን ለስድስት ዓመታት በየዕለቱ በጀርባው ተሸክሞ ትምህርት ቤት ያደረሰው እንደነበር ተሰምቷል።

የ12 ዓመቱ ታዳጊ ዡ ቢንግያንግ ጓደኛውን ትምህርት ቤት ከማድረስ በተጨማሪ ምሳ ሰዓት ላይም ይመግበው እንደነበር ተነግሯል።

ቢንግያንግ  ሲናገር ጓደኛው እንደማይከብደው ገልጾ ፥ እሱን መርዳቱ እንደሚያስደስተውም ተናግሯል።

የአካል ጉዳተኛው ዣንግ በበኩሉ ተሸክሞ ትምህርት ቤት ለሚያደርሰው ጓደኛው በበቂ ሁኔታ አመስግኜው አላውቅም ይላል።

በደቡባዊ ቻይና በሚገኝ የመጀመሪያ ደረጃ ትምህርት ቤት የሚማሩት ሁለቱ ታዳጊዎች በአሁኑ ወቅት የስድስተኛ ክፍል ተማሪዎች ናቸው።

ዣንግ የአካል ጉዳቱ ያጋጠመው አራተኛ ዓመቱ ላይ ሲሆን፥ ጡንቻዎቹ በራሱ ቆሞ እንዳይራመድ አድርገውታል።

ሆኖም ዣንግ በህመሙ ምክንያት ከትምህርት ቤት እንዳይቀር ከአንደኛ ክፍል ጀምሮ በጓደኛው ብርታት እስከ ስድስተኛ ክፍል መድረስ ችሏል።

ቢንግያንግ ጉዳዩን በተመለከተ እንዲህ ይላል እኔ አጠገቡ ያለሁት ካልረዳሁት ሌላ ሰው መጥቶ አይረዳውም ብሏል።

በዚህም ምክንያት ጓደኛውን በየዕለቱ በጀርባዎቹ ተሸክሞ ትምህርት ቤት እደሚያደርሰው ተነግሯል።

መምህራኑም ቢንግያንግ አንድም ቀን ስለጓደኛው ሲያማርር ሰምተው እንደማያወቁ ገልጸዋል።

ሌላኛው አስገራሚ ጉዳይ ደግሞ ቢንግያንግ ለስድስት ዓመታት ያህል ጓደኛው ተሸክሞ ትምህርት ቤት ሲያደርስ ስለጉዳዩ ወላጆች ምንም ነገር ያለማወቃቸው ሲሆን፥ እሱም ስለጉዳዩ አንድም ነገር ተናግሮ አያውቅም ተብሏል።

እናትዬው የልጃቸውን ነገር የተረዱት ሌሎች ሰዎች ስለጉዳዩ ሲወያዩ ሰምተው መሆኑን ተናግረዋል።

ዡ ቢንግያንግ ወደፊት ምን መሆን ትፈልጋለህ ተብሎ ለተጠየቀው ጥያቄም ወደፊት ህልሜ እርዳታ ለሚያስፈልጋቸው ሰዎች መድረስ ነው ብሏል።

ምንጭ፦ሜይልኦንላይን

በአብርሃም ፈቀደ

You might also like
Comments
Loading...