Fana: At a Speed of Life!

የሱዳን ጦር ፕሬዚዳንት አልበሽርን በማንሳት ስልጣኑን ተቆጣጠረ

አዲስ አበባ፣ ሚያዝያ 3፣ 2011 (ኤፍ.ቢ.ሲ) የሱዳን ጦር ፕሬዚዳንት አልበሽርን ከስልጣን በማንሳት ስልጣኑን መቆጣጠሩን አስታወቀ።

የመከላከያ ሚኒስትሩ አህመድ አዋድ ቢን አውፍ በሀገሪቱ የቴሌቪዥን ጣቢያ በሰጡት መግለጫ የሱዳን ጦር ፕሬዚዳንት ኦማር ሀሰን አልበሽርን ከስልጣን በማውረድ ስልጣን መቆጣጠሩን አስታውቋል።

በዚህ መሰረትም ሀገሪቱን ለሁለት ዓመታት የሚያስተዳድር ወታደራዊ የሽግግር መንግስት መቋቋሙን ሚኒስትሩ ተናግረዋል።

የወታደራዊ የሽግግር መንግስቱንም የመከላካያ ሚኒስትሩ ጄኔራል አህመድ አዋድ ቢን አውፍ የሚመሩት ይሆናል ነው የተባለው።

በተጨማሪም ለሶስት ወራት የሚቆይ የአስቸኳይ ጊዜ አዋጅ መታወጁ ነው የተገለጸው።

ከዚህ ባለፈም የሱዳን ህገመንግስት ከስራ ውጭ መሆኑን፣ የሀገሪቱ ድንበሮች መዘጋታቸውንና ለ24 ሰዓታት የአየር ክልሏ ከእንቅስቃሴ ውጭ መሆኑን ይፋ አድርገዋል።

ጦሩ ፕሬዚዳንት ኦማር ሀሰን አልበሽርን በቁጥጥር ስር ማዋሉም ተገልጿል።

በሱዳን ከወራት በፊት በዳቦ ዋጋ መጨመር ምክንያት የተቀሰቀሰው ህዝባዊ አመፅ በቅርቡ አድማሱን አስፍቶ ፕሬዚዳንት አልበሽር ከስልጣን እንዲወርዱ ወደመጠየቅ መሸጋገሩ ይታወሳል።

በዛሬው ዕለትም የአልበሽርን ከስልጣን መዉረድና በቁጥጥር ስር መዋል ተከትከሎ ዜጎች በተለያዩ የሀገሪቱ ከተማዎች በአደባባይ በመውጣት ደስታቸውን እገለፁይገኛሉ።

ፕሬዚዳንት ኦማር ሀሰን አልበሽር እንደ አውሮፓውያኑ አቆጣጠር ከ1989 ጀምሮ ላለፉት 30 ዓመታት ሀገሪቱን ሲያስተዳድሩ ቆይተዋል።

ምንጭ ፡-አልጀዚራና ቢቢሲ

You might also like
Comments
Loading...