Fana: At a Speed of Life!

የሱዳን ወታደራዊ የሽግግር ምክር ቤት አባላት አዲስ አበባ ገቡ

አዲስ አበባ፣ሚያዚያ 7፣2011 (ኤፍ.ቢ.ሲ) የሱዳን ወታደራዊ የሽግግር ምክር ቤት አባላት በዛሬው ዕለት አዲስ አበባ ገብተዋል።

በጄኔራል ገላለዲን አልሼክ የሚመራ የሱዳን ወታደራዊ የሽግግር ምክር ቤት አባላት ቡድን ቦሌ አለም አቀፍ አውሮፕላን ማረፊያ ሲደርሱ የውጭ ጉዳይ ሚኒስትር ዴኤታ ወይዘሮ ሂሩት ዘመነ አቀባበል አድርገውላቸዋል።

ጄኔራል ገላለዲን ከወይዘሮ ሂሩት ጋር ውይይት አድርገዋል።

በውይይቱም ጄኔራሉ የሱዳን ጦር ፕሬዚዳንት አልበሽርን ከስልጣን ያስወገደው ዜጎች ያላቸውን የለውጥ ፍላጎት ለማሟላት እንጂ ሥልጣን የመያዝ ፍላጎት ኖሮት አይደለም ብለዋል።

ከዚህ ባለፈም ኢትዮጵያ በሀገሪቱ እየተካሄደ ያለውን የለውጥ ሂደት በቅርበት የምትከታተልበትን ሁኔታ አድንቀዋል።

ይህም ሁለቱ ሀገራት በቀጣይ ለሚኖራቸው መልካም የሆነ የሁለትዮሽ ግንኙነት ጥሩ ማሳያ መሆኑን አንስተዋል።

በሀገሪቱ እየተካሄደ ያለው ለውጥ በሰላም እንዲከናወን የበኩላችን አስተዋፅኦ እያበረከትን ነው ያሉት የምክር ቤት አባላት፥ ስልጣኑን ለሲቭል ዜጎች ለማስረከብ ከሚመለከታቸው አካላት ጋር እየመከሩ መሆኑን ገልፀዋል።

ለውጡ በሰላም ይካሄድ ዘንድም የአፍሪካ ህብረትና የአለም አቀፉ ማህበረሰብ ከወታደራዊ የሽግግር መንግስቱ ጎን እዲቆሙ ጥሪ አቅርበዋል።

ወይዘሮ ሂሩት በበኩላቸው ኢትዮጵያ በሱዳን እየተካሄደ ያለው ለውጥ ግቡን እንዲመታ እና በሰላም እንዲከናወን ከምክር ቤቱና ከሱዳን ህዝብ ጎን የምትቆም መሆኑን ገልፀዋል።

You might also like
Comments
Loading...