Fana: At a Speed of Life!

የሱዳን ወታደራዊው የሽግግር ምክር ቤት ሃላፊ ስልጣን መልቀቃቸውን አስታወቁ

አዲስ አበባ ፣ ሚያዚያ 5 ፣ 2011 (ኤፍ ቢ ሲ) የሱዳኑን መፈንቅለ መንግስት የመሩት የወታደራዊው የሽግግር ምክር ቤት ሃላፊ ጀኔራል አዋድ ኢብን አውፍ ስልጣን መልቀቃቸውን አስታወቁ።

ጀኔራሉ በሃገሪቱ ብሄራዊ የቴሌቪዥን ጣቢያ ባደረጉት ንግግር ስልጣናቸውን መልቀቃቸውን አስታውቀዋል።

በእርሳቸው ምትክም ሌተናል ጀኔራል አብደል ፋታ ቡርሃንን መተካታቸውን ገልጸዋል።

ለመላው ሱዳናውያንና ለህዝቦች ጥቅም ሲሉ ከሃላፊነት መልቀቃቸውንም ነው ጀኔራሉ ያስታወቁት።

ጀኔራሉ ሃገሪቱን ለ30 አመታት የመሯትን ፕሬዚዳንት ኦማር ሃሰን አልበሽርን ከስልጣን ለማውረድ የተካሄደውን መፈንቅለ መንግስት ከመሩ ከአንድ ቀን በኋላ ነው ስልጣናቸውን የለቀቁት።

ኦማር ሃሰን አልበሽር ከትናንት በስቲያ በተደረገ መፈንቅለ መንግስት ከስልጣን መነሳታቸው ይታወሳል።

ይህን ተከትሎም ሃገሪቱን የሚመራ ወታደራዊ የሽግግር ምክር ቤት ቀጣዩ የሃገሪቱ ምርጫ እስከሚካሄድ ድረስ ሃገሪቱን እንደሚያስተዳድር ገልጿል።

አሁን ላይም በሃገሪቱ ለሶስት ወራት የሚቆይ የአስቸኳይ ጊዜ አዋጅ አውጇል።

የሃገሬው ዜጎች ግን ለሃገሪቱ ስር ነቀል ለውጥ ያስፈልጋል በሚል የሚያደርጉትን ተቃውሞ አላቋረጡም።

አዲስ የተተኩት አብደል ፋታ ቡርሃንም ለተቃውሞ አደባባይ የወጡ ሰልፈኞችን ፍላጎት ለማወቅ ከሰልፈኞቹ ጋር ይገናኛሉ ተብሎ ይጠበቃል።

 

ምንጭ፦ አልጀዚራ እና ቢቢሲ

 

 

You might also like
Comments
Loading...