Fana: At a Speed of Life!

የረጲ የደረቅ ቆሻሻ ኃይል ማመንጫ የቅድመ ሙካ የኤሌክትሪክ ኃይል ማመንጨት ጀመረ

አዲስ አበባ ፣ ሚያዚያ 4 ፣ 2011 (ኤፍ ቢ ሲ) የረጲ ደረቅ ቆሻሻ ኃይል ማመንጫ ጣቢያ ከትናንት ጀምሮ በከፊል የቅድመ ሙከራ የኤሌክትሪክ ኃይል ማመንጨት ስራ ጀመረ።

የኃይል ማመንጫ ጣቢያው ተወካይ ሥራ አስኪያጅ አቶ አስተዋይ ጎንፉ የሃይል ማመንጫ ጣቢያው ያላለቁ የሙከራ እና የፍተሻ ሥራዎች ስለነበሩበት ሃይል ሳያመነጭ መቆየቱን ተናግረዋል።

ከቻይና ኤምባሲ ጋር በተደረገ ድርድርም ቻይና ብሄራዊ ኤሌክትሪክ ኩባንያ የተባለ ተቋሯጭ ወደ ስራ እንዲገባ በመደረጉ ጣቢያው የቅድመ ሙከራ የኤሌክትሪክ ኃይል ማመንጨት ስራ መጀመሩንም ገልጸዋል።

እስካሁን በኃይል ማመንጫው ካሉት ሁለት የውሃ ማፍያ ታንከሮች በአንደኛው የሚገኘውን ከ708 ቶን በላይ ቆሻሻ በማቃጠል ከ162 ሜጋ ዋት በላይ የኤሌክትሪክ ኃይል ማመንጨት መቻሉንም ጠቅሰዋል።

እንደ ተወካይ ስራ አስኪያጁ ገለጻ ዛሬ ማታ ሁለተኛውን የውሃ ማፍያ ታንከር ወደ ሥራ በማስገባት ጣቢያው በሙሉ አቅሙ ኤሌክትሪክ ኃይል የማመንጨት ሙከራ ይጀምራል።

ለአምስት ተከታታይ ቀናት የሚካሄደውን ሙከራ በተሳካ ሁኔታ ለማከናወን የሚያስችል ከ7 ሺህ ቶን በላይ የሚቃጠል ቆሻሻ መዘጋጀቱን ከኢትዮጵያ ኤሌክትሪክ ሃይል ያገኘነው መረጃ ያመላክታል።

የሙከራ ሥራው በስኬት ከተጠናቀቀም የኢትዮጵያ ኤሌክትሪክ ኃይል ጣቢያውን ተረክቦ ወደ ብሔራዊ የኃይል ቋት በማስገባት መደበኛ ስራውን ይቀጥላል ብለዋል።

የኃይል ማመንጫው ወደ ሥራ መግባት ለኃይል አቅርቦቱ ከሚያበረክተው አስተዋጽኦ በተጨማሪ በየቀኑ 1 ሺህ 400 ቶን ቆሻሻ ከአዲስ አባባ ከተማ በመረከብ የከተማዋን የቆሻሻ አወጋገድ ስርዓት ለማዘመንና ጽዱ ለማድረግ እንደሚያግዝ ታምኖበታል።

You might also like
Comments
Loading...