Fana: At a Speed of Life!

የመከላከያ ሰራዊት ግጭት ተከስቶ በነበረባቸው የአማራ ክልል የተለያዩ አካባቢዎች በመግባት የማረጋጋት ስራ በማከናወን ላይ መሆኑን ገለፀ

አዲስ አበባ፣ መጋቢት 30፣ 2011 (ኤፍ.ቢ.ሲ) የሀገር መከላከያ ሰራዊት ግጭት ተከስቶ በነበረባቸው በአማራ ክልል ኦሮሞ ብሔረሰብ አስተዳደር እና በሰሜን ሸዋ ዞኖች  በመግባት የመቆጣጠር እና የማረጋጋት ስራ በማከናወን ላይ መሆኑን ገለፀ።

በኢፌዴሪ መከላከያ ሚኒስቴር የምክትል ኢታማዡር ሹም ፅህፈት ቤት ሀላፊ ኮለኔል ተስፋዬ አያሌው ለፋና ብሮድካስቲንግ ኮርፖሬትእንደተናገሩት፥ የክልሉ መንግሰት ባቀረበው ጥሪ መሰረት የሀገር መከላከያ ሰራዊት ወደ አካባቢዎቹ ገብቶ የማረጋጋት ስራ በማከናወን ላይ ይገኛል።

አሁን ላይም አካባቢዎቹ እየተረጋጉ ቢሆንም በመንገድ ዳርቻዎች ላይ አልፎ አልፎ የተኩስ ልውውጥ እንዳለ ነው ያመለከቱት።

ከተሞች ወደ መረጋጋት ቢገቡም የተኩስ ልውውጡ የሚሰማውም በገጠራማ አካባቢዎች መሆኑን ጠቁመዋል።

አካባቢዎቹ ሰፊ እንደመሆናቸውም በብቃት ለመቆጣጠር ተጨማሪ ሀይል ወደ ስፍራዎቹ አሁንም እየገባ መሆኑን የጠቆሙት ሃላፊው፥ በሁሉም ግጭት በነበረባቸው አካባቢዎች እየገባ የማረጋጋት እና የመቆጣጠረ ስራ ያከናውናል ብለዋል።

የግጭቱ መንስኤን ከህብረተሰቡ ጋር በመሆን የማጣራት ስራ እንደሚከናወን እና ያንን መሰረት በማድረግ አርምጃ እንደሚወሰድ አመልክተዋል።

ተዘግተው ያሉ የደሴ፣ ኮምቦልቻ፣ ደብረ ሲናና እና ደብረ በርሃን መንገዶችንም የማስከፈት ስራ እንደሚከናወን ጠቁመዋል።

ኮለኔል ተስፋዬ በሁለቱም በኩል ታጥቆ ያለ ህዝብ የሚኖርበት አካካባቢ መሆኑን ነው የገለፁት።

በግጭቶቹ ጀርባ ማን ነው ያለው የሚለው ተጣርቶ እርምጃ እስከሚወሰድ ድረስ ህብረተሰቡ ተረጋግቶ መደበኛ ማህበራዊ እና ኢኮኖሚያዊ እንቅስቃሴውን እንዲያከናውን ጠይቀዋል።

ግጭቶቹ ባሉባቸው አካባቢዎች  በሁለቱም ወገን ያሉ አመራሮች ከጉዳዩ እጃቸውን እንዲያስወጡም አሳስበዋል።

You might also like
Comments
Loading...