Fana: At a Speed of Life!

የህዝብ ተወካዮች ምክር ቤት የመቐለ ከተማን የንጹህ መጠጥ ውሃ ፕሮጀክት ማስፈጸሚያ የብድር ስምምነትን አጸደቀ

አዲስ አበባ፣ መጋቢት 28፣ 2011 (ኤፍ.ቢ.ሲ) የህዝብ ተወካዮች ምክር ቤት ለመቐለ ከተማ የንጹህ መጠጥ ውሃ ፕሮጀክት ማስፈጸሚያ የብድር ስምምነትን በመሁሉ ድምጽ አጸደቀ።

የሚኒስትሮች ምክር ቤት በህዳር ወር ለመቐለ ከተማ የንጹህ መጠጥ ውሃ ፕሮጀክት ማስፈጸሚያ ከቻይና ኤክስፖርት ኢምፖርት ባንክ ጋር በተደረገው የብድር ስምምነት ረቂቅ ላይ ተወያይቶ ለህዝብ ተወካዮች መምራቱ ይታወሳል።

የብድር ስምምነቱ በመካከለኛ ጊዜ የሚከፈል፣ የወጪ ጫናው ቀላልና ከሀገሪቱ የብድር አስተዳደር ስትራቴጂ ጋር የሚጣጣም መሆኑን ከግምት ውስጥ በማስገባት የብድር ስምምነቱን ተቀብሎ ይጸድቅ ዘንድ ለህዝብ ተወካዮች ምክር ቤት እንዲተላለፍ ወስኖ ነበር።

የህዝብ ተወካዮች ምክር ቤትም ትናንት ባካሄደው አራተኛ መደበኛ ስብሰባ ከሚኒስትሮች ምክር ቤት የቀረበለትን የብድር ስምምነት መርምሮ አጽድቋል።

ከቻይና ኤክስፖርት ኢምፖርት ባንክ ጋር የተገባው የብድር ስምምነት የ250 ሚሊየን የአሜሪካ ዶላር መጠን ያለው ነው።

You might also like
Comments
Loading...