Fana: At a Speed of Life!

የህወሓት ማዕከላዊ ኮሚቴ መደበኛ ስብሰባውን አጠናቀቀ

አዲስ አበባ፣ ሚያዚያ 5፣ 2011 (ኤፍ ቢ ሲ) የህዝባዊ ወያነ ሓርነት ትግራይ (ህወሓት) ማዕከላዊ ኮሚቴ መደበኛ ስብሰባውን አጠናቀቀ።

ማዕከላዊ ኮሚቴው ከመጋቢት 30 ቀን እስከ ሚያዚያ 3 ቀን 2011 ዓ.ም ለአራት ተከታታይ ቀናት በመቐለ ከተማ ሲያካሂድ የቆየውን መደበኛ ስብሰባ የተለያዩ ውሳኔዎችን በማሳለፍ አጠናቋል።

በአራት ቀን ቆይታውም የ6 ወር የስራ አፈጻጸሙን የገመገመ ሲሆን፥ በወቅታዊ ሃገራዊና ክልላዊ ጉዳዮች ላይ በመወያየት የተለያዩ ውሳኔዎችን አሳልፏል።

የክልሉን  ኢኮኖሚያዊ፣ ማህበራዊና  የመልካም አስተዳዳር ጉዳዮች በጥልቀት የተመለከተው ማዕካላዊ ኮሚቴው፥ በተሃድሶው ወቅት የተገመገሙ እና የተቀመጡ አቅጣጫዎች አፈፃፀምን ገምግሟል።

ከሀገራዊና ወቅታዊ  ሁኔታዎች  ጋር በማዛመድም በሃገሪቱ እያታዩ ያሉ ችግሮችን  ከአጠቃላይ  የሃገሪቱ ሁኔታ ብሎም ለክልሉ ያለውን ትርጉም በመገምገም የመፍትሄ አቅጫዎችን አስቀምጧል።

በአሁኑ ሰዓት ሃገሪቱ  ወደ አደጋ እየገባች መሆኑና አሳሳቢ ደረጃ ላይ መድርሷን በመግለጽ፥  ኢህአዴግ  በቅርቡ  በጥልቅ የመታደስ እንቅስሴ በሚፈለገው ደረጃ ላይ ሳይደርስ መቅረቱን ተከትሎ የሰላምና መረጋጋረት ችግሩ እየተባባሰ መምጣቱን አንስቷል።

ግንባሩ በ2010 ያስቀመጣቸው በጥልቀት መታደስ እንቅስቃሴዎች በጥብቅ ዲሲፒሊንና ተጣያቂነት እንዲተገበሩ ያለመደረጉ መሆኑንም ገልጿል።

ለዚሁ መፍትሄም ኢህአዴግ  ህገመንገስቱና  የፌደራል ስርዓቱ  ሳይሸራረፍ ተግባራዊ በማድረግ  የሀገሪቱን ህልውና ማረጋገጥ እንዳለበት ነው ያስታወቀው።

በቅረቡ በሃገሪቱ አንድ ፓርቲ  ለመመስረት የቀረበውን ሃሳብ  በተመለከተ ውህደቱ ከመፈጸሙ በፊት  ሊያዋህዱ የሚችሉ ተግባራት መከናወን እንዳለባቸው እምነት እንዳለው የገለጸው ማዕከላዊ ኮሚቴው፥ ሁሉም እህት ድርጅቶችና  መላው አባላቱ ሰፊ ዴሞክራሲዊ  ውይይት ማካሄድ እንዳለባቸውም አስቀምጧል።

በተለያዩ የሀገሪቱ አካባቢዎች እያጋጠመ ባለው ሞት፣  መፈናቀልና እንግልት የተሰማውን ሃዘን በመግለጽ በቀጣይ በህዝብ ላይ ተመሳሳይ ተግባር እንዳይፈፀም የህወሓት ማዕከላዊ ኮሚቴ ከመቸውም በላይ በፅናት ይታገላል ብሏል።

የኢትዮጵያ ብሄሮች፣ ብሄረሰቦችና ህዝቦች ዴሞክራሲያዊ ሃይሎች ለህገ መንግስቱና ፌደራል ስርዓቱ ጽኑ እምነት በመያዝ  እንዲታገሉለት ጥሪ አቅርቧል።

በኢትዮጵያና ኤርትራ መካካል የተጀመረው  መልካም ግንኙነት በመገምገምም በትግራይ እና ኤርትራ ህዝቦች መካከል የህዝብ ለህዝብ ግንኙነቱ እንዲጎለብት፣ ግንኙነቱ ቀጣይ፣ ዘላቂና አስተማማኝ እንዲሆን ማዕከላዊ ኮሚቴው ያለውን ዝግጁነት አረጋግጧል።

 

You might also like
Comments
Loading...