Fana: At a Speed of Life!

ዓለም ላይ ከአራት የጤና ተቋማት ውስጥ አንዱ በቂ የሆነ የውሃ አቅርቦት የለውም – የዓለም የጤና ድርጅት

አዲስ አበባ፣ መጋቢት 27፣2011 (ኤፍ.ቢ.ሲ) ዓለም ላይ ከአራት የጤና ተቋማት ውስጥ በአንዱ በቂ የሆነ የውሃ አቅርቦት እንደሌለው የዓለም የጤና ድርጅት አስታውቋል።

የአለም የጤና ድርጅትና የተባበሩት መንግስታት የህጻናት መርጃ ድርጅት (ዩኒሴፍ) በትናንትናው ዕለት በጤና ተቋማት ላይ ያለውን የንጹህ ውሃ አቅርቦት ችግር በተመለከተ ወቅታዊ ሪፖርት ይፋ አድርገዋል።

በሪፖርታቸው በዓለም ዙሪያ ከሚገኙ የጤና አግልግሎት ከሚሰጡ አራት ተቋማት ውስጥ አንዱ መሰርታዊ የውሃ አቅርቦት ችግር የሚስተዋልበት መሆኑን ጠቅሰዋል።

ይህም ጥራት ያለው የህክምና አገልግሎት ለመስጠት ካለማስቻሉ በላይ ብዙዎችን ለተለየዩ ተላላፊ በሽታዎች የዳረገ መሆኑ ተገልጿል።

እንደ ተቋማቱ ሪፖርት በችግሩ ምክንያት በዓለም ላይ 2 ቢሊየን የሚደርሱ ሰዎች በተለያዩ በሽታዎች ተፅዕኖ ስር መውደቃቸው ነው የተገለፀው።

ከውሃ አቅርቦት በተጨማሪም ዓለም ላይ ከሚገኙ አምስት የጤና ተቋማት ውስጥ አንዱ ምንም አይነት የንፅህና አገልግሎት መስጫ ማዕከል የሌለው መሆኑ በሪፖርቱ ተመላክቷል።

ይህም ከ 1 ነጥብ 5 ቢሊየን በላይ ሰዎችን በችግሩ ምክንያት ለሚከሰቱ በሽታዎች ያጋለጠ መሆኑ ተጠቁሟል።

በተለይም በተቋሙ በሚወለዱ ጨቅላ ህፃናት ላይ የሚደርሰው ጉዳት አስከፊ መሆኑን ሪፖርቱ አመላክቷል።

በዚህም በዓለም በየዓመቱ በወሊድ ወቅት በሚፈጠር የንፅህና ችግር ምክንያት የጤና ዕክል አጋጥሟቸው ለህልፈት የሚዳረጉ ጨቅላ ህፃናት ቁጥር ከ1 ሚሊየን በላይ መሆኑ በሪፖርቱ ተጠቅሷል።

ምንጭ፦ ሺንዋ

You might also like
Comments
Loading...