Fana: At a Speed of Life!

ከ3 ዓመት በፊት የተጀመረውና በ2012 ወደ ስራ ይገባል የተባለው የአጅማ ጫጫ ወንዝ ግድብ ፕሮጀክት ዛሬም አልተጠናቀቀም

አዲስ አበባ፣ ሚያዚያ 15፣ 2011 (ኤፍ.ቢ.ሲ) በአማራ ክልል ሰሜን ሸዋ ዞን ከሶስት ዓመታት በፊት በ3 ቢሊየን ብር ወጭ ይገነባል ተብሎ የመሰረት ድንጋይ የተጣለለት የአጅማ ጫጫ ወንዝ ግድብ ፕሮጀክት ግንባታው ዛሬም አልተጠናቀቀም።

የአማራ ክልል መንግስት በተለያዩ አካባቢዎች የተለያዩ የመስኖ ግንባታ ፕሮጀክቶችን በማከናወን ላይ ይገኛል።

ይህም አርሶ አደሩ በዓመት ሁለትና ከዚያ በላይ እንዲያመርት ማድረግና የአርሶ አደሩን ተጠቃሚነት ማሳደግና ህይወቱን ማሻሻል የሚያስችል ነው።

ክልሉ ከሚያከናውናቸው የመስኖ ግንባታ ተግባራት መካከል በሰሜን ሸዋ ዞን በ2008 ዓ.ም የመሰረት ድንጋዩ ተጥሎ የነበረው የአጅማ ጫጫ ወንዝ የመስኖ ግድብ ፕሮጀክት አንዱ ነው።

ፕሮጀክቱ የመሰረት ድንጋዩ ሲቀመጥም ከአራት አመት በኋላ ተጠናቆ አገልግሎት መስጠት እንደሚጀምር ተገልፆ ነበር።

ይሁን እንጂ ይህ የአጅማ ጫጫ ወንዝ ግድብ አሁን ላይ ቀድሞ በተባለው ልክና መጠን መጓዝ አልቻለም ነው የተባለው።

ይህን ተከትሎም ፋና ብሮድካስቲንግ ኮርፖሬት በ2012 ዓ.ም ተጠናቆ አገልግሎት መስጠት እንደሚችል ተገልጾ የነበረው ይህ ግድብ አሁን ላይ ፍፃሜው ላይ መድረስ ሲገባው ስለምን ዘገየ ሲል የክልሉን ውሀ መስኖ እና ኢነርጂ ልማት ቢሮን ጠይቋል።

የቢሮው ምክትል ሀላፊ አቶ መለሰ ስንታየሁ እንደሚሉት ለዚህ ትልቅ ፕሮጀክት መዘግየትና መጓተት በዋናነት የዲዛይን ችግር መሆኑን ጠቅሰዋል።

በተለያዩ የግንባታ ከፍሎች ተለይቶ ይገነባል የተባለው የግድቡ ግንባታ በተለይም ለስራው መቀላጠፍና ፍጥነት የሚያግዙት የመጀመሪያዎቹ የመሰረተ ልማት አውታር  ግንባታ ተግባራት እየተከናወኑ መሆኑን አንስተዋል።

ፕሮጀክቱ አሁን ላይ የግንባታ ስራዎቹ የተጀመሩ ሲሆን፥ ስራውን በአግባቡ፣ በፍጥነትና በጥራት  ለማከናወን ይቻል ዘንድም ከሚመለከታቸው የክልልና የፌዴራል ተቋማት ጋር በትብብር እየተሰራ መሆኑን ሀላፊው ገልፀዋል።

የግድብ ፕሮጀክት አማካሪ በበኩሉ የአጅማ ጫጫ ወንዝ ግድብ ሲታሰብ ሁሉም የዲዛይን ስራዎች በአንድ ጊዜ እንዲያልቁ ሳይሆን ዋና ዋናዎቹ እና እስፈላጊዎቹ ቀድመው ቀስ በቀስ እንዲገነቡ ነበር ውላችን ነው ያሉት።

የአማራ የዲዛይንና ቁጥጥር ስራዎች ድርጅት ዋና ስራ እስፈፃሚ አቶ በላይ ዘገየ ለፋና ብሮድካስቲንግ ኮርፖሬት እንደገለጹት ለዚህ በክልል አቅም ለሚገነባው ግዙፍ ፕሮጀክት መዘግየት የዲዛይን ችግር አይደለም ብለዋል፤እንደ አብነትም ቀድመው የተጀመሩ ስራዎችን ያነሳሉ።

በዚህ መሰረት የመጀመሪያ ዙር ስራዎች ቀድመው መጠናቀቅ ሲገባቸው ባግባቡ ሳይፈፀሙ ወደ 2009 ዓ.ም መሸጋገራቸውን ያነሳሉ።

አማካሪ ድርጀቱም በዚህ መሰረት ለምን ስራዎች በጊዜ አልተጠናቀውም ብሎ በሚጠይቅበት ጊዜ ለፕሮጀክቱ እንቅፋትና መሰናክል ሆኖ ተቋራጩን አላላውስ ያለው ችግር ይህ ነው ብለዋል አቶ በላይ።

ሌላኛው ችግር ደግሞ ከራሱ ከግንባተው ተቋራጭ የአማራ ውሀ ስራዎች ድርጅት ሲሆን፥ የአቅም ውስንነት ስራውን በሚፈለገው ልክ ለማከናወን ተጨማሪ ፈተናና ማነቆ ሆኗል።

ይህ የአጅማ ጫጫ ወንዝ የግድብ ፕሮጀክት ከሰባት ሺህ ሄክታር በላይ የማልማት አቅም አለው የተባለ ሲሆን፥ፕሮጀክቱ ቀድሞ ከተያዘለት ሶስት ቢሊየን ብር በዕጥፍ ጨምሮ ስድስት ቢሊየን መጠየቁ ተገልጿል።

ፕሮጀክቱም ከስድስት ዓመት በኋላ ይጠናቀቃል ተብሎ ይጠበቃል።

 

በመሃመድ አሊ

You might also like
Comments
Loading...