Fana: At a Speed of Life!

ከ20 ሚሊየን በላይ የሚሆኑ ከ3 ዓመት በላይ ያገለገሉ አጎበሮችን ለመተካት እየተሰራ ነው

አዲስ አበባ፣ ሚያዚያ 11፣ 2011 (ኤፍ.ቢ.ሲ) የጤና ሚኒስቴር ከሶስት ዓመት በላይ ያገለገሉ ከ20 ሚሊየን በላይ አጎበሮችን ለመተካት እየሰራ መሆኑን አስታውቋል።

ሚኒስቴሩ ለተጠቃሚዎች ተላልፈው ከሶስት ዓመት በላይ ያገለገሉ አጎበሮችን ለመቀየር የተጀመረው የስርጭት ስራ ተጠናክሮ መቀጠሉን ገልጿል።

ከዚህ ባለፈም በ2011 በጀት ዓመት ብቻ ከ12 ሚሊየን በላይ ሰዎችን የአጎበር ተጠቃሚ ለማድረግ ታቅዶ እስካሁን ከ6 ሚሊየን በላይ አጎበሮች መሰራጨታቸው ነው የተገለፀው።

የቤት ውስጥ የወባ ስርጭትን ለማጠናከርም 378 ሺህ 956 ኪሎ ግራም የኬሚካል ግዥ ተፈጽሞ 3 ነጥብ 5 ሚሊዮን ቤቶችን መርጨት ተችሏል ነው ያለው።

በዚህም ከ11 ሚሊየን በላይ የሚገመቱ ዜጎችን ከወባ በሽታ ተጋላጭነት መከላከል መቻሉን ሚኒስቴሩ አስታውቋል።

የወባ በሽታ ምርመራና ህክምና በጥራት እንዲሰራ ለማድረግም 500 ማጉያ መነፅሮች ወባን ለማስወገድ ስራ በተመረጡ ወረዳዎች ውስጥ ለሚገኙ ጤና ጣቢያዎች፣ ለጥናትና ምርምር ማዕከላት እንዲሁም ለክልል ሪፊራል ቤተ ሙከራዎች መሰራጨታቸው ተጠቁሟል፡፡

በተጨማሪም የወባ በሽታ ማስወገድ ኘሮግራምን ለማሳካትና የበሽታውን ስርጭት ለመግታት በህክምናው ረገድ “ኘሪማኪውን” መድሃኒት በሁሉም የጤና ተቋማት እየተሰጠ ነው ተብሏል።

በተያያዘ ዜና የዘንድሮው የአለም የወባ ቀን ሚያዚያ 17 ቀን 2011 ዓ.ም በድሬዳዋ ከተማ “ወባን ማጥፋት ከእኔ ይጀምራል!” በሚል መሪ ቃል የሚከበር መሆኑ ታውቋል፡

You might also like
Comments
Loading...