Fana: At a Speed of Life!

ከ14 ሺህ 800 በላይ ሀሰተኛ የመቶ ብር ኖቶች በሰቆጣ ተያዙ

አዲስ አበባ፣ ሚያዚያ 15፣ 2011 (ኤፍ.ቢ.ሲ) በዋግህምራ ብሄረሰብ አስተዳደር ዞን ሰቆጣ ከተማ 14 ሺህ 800 ሀሰተኛ የመቶ ብር ኖቶች መያዛቸውን ፖሊስ አስታወቀ፡፡

ሀሰተኛ የብር ኖቶቹ ለትንሳዔ በዓል ግብይት ጥቅም ላይ ሊውሉ የተዘጋጁ እንደነበሩም ፖሊስ አክሎ ገልጿል።

የከተማ አስተዳደሩ ፖሊስ ጽህፈት ቤት የማህበረሰብ አቀፍ ወንጀል መከላከል የሥራ ሂደት መሪ ረዳት ኢንስፔክተር ካሳሁን አየለ እንደገሉት፥ ኖቶቹ የተያዙት ትናንት ከምሽቱ ሁለት ሰዓት ላይ ነው።

በከተማው 01 ቀበሌ ውስጥ የተያዙት ኖቶች የትንሳዔ በዓል ግብይትን ተጠቅሞ ወደ ግብይት ለማስገባት የተዘጋጁ እንደነበርም አስረድተዋል።

ፖሊስ ከኅብረተሰቡ በደረሰው ጥቆማ መሠረት ባደረገው ክትትል ኖቶቹን መያዙንና ተጠርጣሪው ግን ለጊዜው ማምለጡን ተናግረዋል።

ፖሊስ ወቅቱ የበዓል ገበያ እንደመሆኑ መሰል ወንጀል እንዳይፈጸም ኅብረተሰቡን እያስተማረ መሆኑንም ረዳት ኢንስፔክተር ካሳሁን ተናግረዋል።

ህብረተሰቡ ንግድ ፈቃድ ሳይኖራቸው ከሚገበያዩ ነጋዴዎችና ጨለማን ተገን አድርጎ ከሚደረግ ግብይት እንዲቆጠብ አሳስበዋል።

ምንጭ፦ ኢዜአ

You might also like
Comments
Loading...